Banku Dezenvolvimentu Aziátiku (ADB) ho Fundu Nasaun Unida ba Infánsia (UNICEF), oferese fasilidade saúde atu bele uza iha Ospitál Lahane, Tersa (02/03/21). Imajen Tatoli/António Gonalves.

DILI, 06 maiu 2021 (TATOLI)—Ministra Saúde (MS), Odete Maria Freitas Belo, rekoñese katak, oras ne’e daudaun fasilidade ba tratamentu pasiente COVID-19 limitadu tebes.

Maski la temi detalla kona-bá kuantidade fasilidade ne’ebé oras ne’e utiliza hodi atende pasiente iha sentru izolamentu-sira, maibé, Odete dehan, númeru pozitivu ne’ebé kontinua aumenta kada loron, sei lori risku boot liu bainhira tama iha situasaun grave.

Notísia relevante:Kazu pozitivu COVID-19 aumenta, Governu deside halo teste swab masal

“Ekipamentu-sira ne’ebé iha mínimu tebes, hanesan ventiladór no kama. Maibé MS prepara ba kazu grave ruma bele halo tratamentu. Problema maka, riksu ne’e aas liu bainhira númeru ne’e  aumenta no ita monu ba iha situasaun grave sei enfrenta problema boot,” Odete Maria Freitas Belo hateten ba jornalista-sira iha otél Novo Turizmu, kinta ne’e.

Ho situasaun ida ne’e, maka, MS kontinua halo konsiensializasaun ba komunidade atu kontribui ba prevensaun transmisaun  COVID-19 iha Timor Leste (TL).

Konsiensializasaun ne’e maka, sempre apela atu uza máskara, fase liman  bebeik, sai hosi uma bainhira iha nesidade urjente no labele halibur-malu barak.

To’o 05 maiu, Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 133, rekoperadu 34 no ativu 1.414.

Jornalista: Felicidade Ximenes

Editor: Cipriano Colo

HAKEREK NO HATÁN

Please enter your comment!
Please enter your name here