Komunidade Comoro-Dili, troka voucher Cesta Bázika iha supermerkadu Leader, kinta (10/12/20). Imajen Tatoli/António Gonçalves.

DILI, 06 maiu 2021 (TATOLI)—Komisaun Anti Korrupsaun (CAC siglá portugés), kontinua halo monitorizasaun ba distribuisaun Cesta Bázika ba komunidade iha territóriu.

“CAC halo nafatin monitorizasaun. Maski iha implementasaun Estadu emerjénsia ho serka sanitária no konfinamentu obrigatóriu ita ladún ativu, maibé iha keixa  ruma hosi komunidade prontu atua,’’Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, hateten ba jornalista Agéncia Tatoli iha nia kna’ar fatin, Praia dos Coqueiros, Dili, kinta ne’e.

Notísia relevante:CAC deskobre irregularidade balun durante distribuisaun Cesta Bázika iha Dili

Luis Oliveira Sampaio esplika, ekipa CAC iha loron hirak liu-bá monitoriza distribuisaun Cesta Bázika iha Dili, iha Suku Mascarenhas identifika sasán balun, ne’ebé komunidade kestiona la tuir presu ne’ebé Governu termina. Nune’e, identifika duni na’an karau, ikus-mai husu kompañia fornesedór kompleta hikas.

CAC apela ba kompañia fornesedór-sira, atu asegura nafatin  prosesu-sira tuir dalan ba rekursu Estadu, hodi fó apoiu ba komunidade iha situasaun difísil.

Tuir dadus hosi Ministériu Koordenadór Asuntu Ekonómiku (MKAE), populasaun 85% ho totál benefisiáriu 1.105.000 iha territóriu nasionál mak simu ona Cesta Bázika.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here