Aimoruk Ivermectin. Imajen/Espesial.

DILI, 06 maiu 2021 (TATOLI)—Deputadu Bankada Partidu Demokrátiku (PD), Mariano Assanami Sabino, husu Governu introdús aimoruk populár Ivermectin (ivermektina) ba populasaun tanba benefísiu boot liu iha prevensaun no kombate propagasaun surtu COVID-19.

Prezidente Partido Democrático (PD), Mariano “Asanami” Sabino. Imajen/Antonio Goncalves

“Kuarentena masal no auto-kuarentena la nesesidade ona ba ita, presiza introdús aimoruk Ivermectin ba populasaun tanba sei fó benefisiu boot liu ba redusaun transmisaun, redús ospitalizasaun no redús mortalidade,” Mariano Assanami Sabino informa ba jornalista sira, iha Parlamentu Nasionál, kinta ne’e.

Nia argumenta, se vasina de’it 20.000 hanesan agora sei la fó impaktu ba saúde públika hanesan iha Índia enfrenta, ne’ebé populasaun vasina ho de’it 2%.

“Ivermectin ne’e aimoruk populár, iha lista esensiál WHO nian, uza ona liu tinan 40. Iha estudu RCT (Randomised Control Trial) no meta analisis hatudu efetivu iha nia prevensaun no tratamentu,” Assamami esplika.

Nasaun barak iha mundu hanesan iha Látina Amérika, Áfrika nia Governu adota no hatudu tradusaun ne’ebé signifikante iha insidénsia COVID-19 liuhosi rezultadu tratamentu sira.

“Iha Timor ita uza Ivermectin tempu kleur ona no iha mos ita-nia esensiál tanba Ivermectin ne’e atu kompleta tán vasina, maibé nia benefísiu boot ba iha prevensaun no relevante tebes ba situasaun Timor nian agora,” nia dehan.

Prezidente Partidu Demokrátiku ne’e, fó-sai katak, aimoruk Ivermectin ne’e bele erradika no kombate SAR-Cov-2 (COVID-19). Ivermectin ne’e nu’udar aimoruk ida-ne’ebé uza hodi trata kualkér tipu infestasaun parasitária sira, inklui piolhos, sarna, segueira rios (oncocercose), estronjiloidíaze, trikuríase, askaríase no filarioze linfátika.

Ivermectin deskobre iha tinan 1975 no hahú uza iha tinan 1981. Aimoruk ne’e tama iha lista medikamentu Organizasaun Mundiál Saúde (OMS) nian, aimoruk ne’e seguru no efikáz liu ba saúde públika. Aimoruk ne’e ninia kustu serka $0,12 iha tratamentu saúde públika.

Deskobrimentu ne’e lidera hosi Monash Biomedicine Discovery Institute (BDI) ho Peter Doherty Institute (Doherty Institute), joint venture ho University of Melbourne no Royal Melbourne Hospital, hatudu katak aimoruk ne’e antíparasitária bele kombate COVID-19 iha oras 48 nia laran.

Hanoin hirak ne’e, Deputadu Assanami simu hosi profisionál saúde sira iha Timor-Leste.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here