Sekretáriu Estadu Komunikasaun Sosiál (SEKOMS), Merício Juvinal dos Reis Akara. Imajen Tatoli/Egas Cristovão

DILI, 05 maiu 2021 (TATOLI)-Sekretáriu Estadu ba Komunikasaun Sosiál (SEKOMS), Merício Juvinal dos Reis “Akara” hateten, estabelesimentu rádiu komunidade ba Ema ho Defisiénsia (EhD) ba oin SEKOMS sei fó apoiu tékniku no ekipamentu ba rádiu komunidade Ema ho Defisiénsia nune’e bele divulga programa no informasaun sira ba públiku.

SEKOMS hato’o lia hirak ne’e bainhira hamutuk ho Diretór Nasionál Promosaun no Dezenvolvimentu Mídia Lokál-DNPDML, tersa (04/05), hala’o vídeo konferénsia ho Diretora Ezekutiva rádiu komunidade ba Ema ho Defisiénsia (EhD) no Fundadór Fundasaun AHISAUN, ko’alia kona-ba preparasaun ba estabelesimentu rádiu komunidade ba Ema ho Defisiénsia sira.

Liuhosi video konferénsia ne’e Sekretáriu Estadu ba Komunikasaun Sosiál, Merício Juvinal dos Reis hateten, estabelesimentu rádiu komunidade EhD  sei jere diretamente hosi ema ho defisiénsia sira ne’ebé hamahan-an iha Fundasaun AHISAUN no SEKOMS  kontinua akompaña funsionamentu servisu iha rádiu komunidade ne’e.

“Ha’u apresia ho preparasaun ema ho defisiénsia sira, liuliu iha área rekursu umanu no infraestrutura hodi estabelese rádiu komunidade ba Ema ho Defisiénsia, tanba ne’e SEKOMS sei fó apoiu tékniku no ekipamentu ba rádiu komunidade Ema ho Defisiénsia nune’e bele divulga programa no informasaun sira ba públiku, tanba estabelesimentu rádiu ba EhD atu Valoriza sira-nia lian iha Sosiedade,” Merício Juvinal dos Reis”Akara” hateten liuhosi komunikadu Imprensa ne’ebé Agência Tatoli asesu, kuarta ne’e.

Governante ne’e, husu rádiu komunidade ba Ema ho Defisiénsia atu kolabora ho Diresaun Nasionál Promosaun no Dezenvolvimentu Mídia Lokál, nune’e bele dezenvolve programa edukativu sira no divulga programa sira kona-ba misaun no vizaun ema ho defisiénsia nian, aleinde programa entretenimentu.

Diretór Nasionál Promosaun no Dezenvolvimentu Mídia Lokál, Paulino Kintas hateten, téknikamente DNPDML prontu atu fó apoiu  rádiu komunidade ba Ema ho Defisiénsia hodi dezenvolve no dezeña programa sira ne’ebé atu publika, tanba ema ho defisiénsia sira-nia lian importante tebes hodi kontribui ba prosesu dezenvolvimentu nasionál.

Liuhosi vídeo konferénsia ne’e, Diretora Ezekutiva rádiu komunidade ba Ema ho Defisiénsia, Emerensiana Alves, hato’o ba SEKOMS katak sira-nia preparasaun atu harii rádiu komunidade ba Ema ho Defisiénsia, ho ninia vizaun no misaun maka atu hamenus no halakon diskrisaun ba ema ho defisiénsia sira iha Timor-Leste liuhosi rádiu Anin Laloran FM.

“Estabelesimentu rádiu ne’e importante tebes nune’e bele promove atividade advokasia ema ho defisiénsia sira nian liuhosi meiu komunikasaun rádiu,” nia dehan.

Tuir nia, estatutu rádiu komunidade ba Ema ho Defisiénsia hetan ona legalizasaun hosi Ministériu Justisa, inklui sertifikadu ba kriasaun rádiu komunidade ne’e no sira mós iha ona espasu atu hala’o servisu ho rekursu umanu ne’ebé sufisiente hodi prodús programa sira

Jornalista       : Arminda Fonseca

Editór              : Francisco Simões

HAKEREK NO HATÁN

Please enter your comment!
Please enter your name here