Ministru Koordenadór Asuntu Ekonómiku, Joaquim Amaral. Imajen TATOLI/Egas Cristóvão

DILI, 05 maiu 2021 (TATOLI)—Tinan ualu ona proposta revizaun saláriu mínimu $115 ba traballadór iha Timor-Leste seidauk iha konkluzaun, maski iha ona diskusaun sira ho entidade relevante sira ne’ebé hamosu proposta hasa’e ba $200.

Ba kestaun ne’e, tuir Ministru Koordenadór Asuntu Ekonómiku (MKAE), Joaquim Amaral, bainhira atu aplika saláriu mínimu tenke bazeia ba analiza ida.

“Atu hasa’e valór saláriu mínimu traballadór, Governu sei halo kalkulasaun rasik hodi hetan montante razoável tanba atualmente iha Timór, Estadu mak fó empregu barak liu kompara ho setór privadu, ne’ebé antes atu estabelese valór presiza rona mós hosi setór privadu, sindikatu inklui halo analiza situasaun reál hodi deside hamutuk,” Ministru Koordenadór hateten iha edifísiu Ministériu Finansa, Aitarak-laran, kuarta ne’e.

Notísia relevante: Tinan-ualu pendente, KSTL husu Governu halo revizaun saláriu mínimu $115

Ezbosu saláriu mínimu mai hosi Sekretaria Estadu Formasaun Profisionál no Empregu (SEFOPE) no entrega ona ba MKAE.

Governante ne’e dehan, proposta revizaun saláriu mínimu traballadór seidauk lori debate iha Konsellu Ministru tanba sei haree uluk prioridade urjente balun liga ho COVID-19 no dezastre naturál.

“Ita konsidera maibé ita mós aliña ho ita-nia situasaun reál, maibé nafatin tau iha ajenda atu haree no tetu ezijénsia balun ne’ebé mak Estadu tau atensaun, la signifika hases direitu traballadór sira, maibé tenta halo balansu ho situasaun reál Estadu. Agora seidauk bele haree tanba iha situasaun urjénsia balun ne’ebé Governu presiza atua uluk,” nia subliña.

Ministru rekoñese, atu halo revizaun ba saláriu mínimu liu prosesu boot ida, maibé tempu mak seidauk define.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here