Prezidente Tribunál Rekursu, Deolindo dos Santos. Imajen Tatoli /Egas Cristovão

DILI, 05 maiu 2021 (TATOLI)—Prezidente Tribunál Rekursu (PTR) Deolindo dos Santos, husu apoia órgaun soberania hotu atu bele estabelese Tribunál Supremu nune’e mantein sistema tribunál.

Suprema tribunál nu’udar brasu (braço) judisiál independente Estadu nian, ne’ebé mantein sistema tribunál iha tribunál sira seluk no sai última tribunál rekursu. Nune’e mós Tribunál Supremu mak verifika kazu sira bainhira iha evidénsia foun. Supremu Tribunál nu’udar mós instituisaun estatál elevada iha sistema konstitusionál ho podér judisiál.

“Ha’u-nia prioridade mak tenke servisu hamutuk ho Parlamentu Nasionál, Governu no Prezidente Repúblika atubele harii supremu tribunál, maibé ida-ne’e tenke ser esforsu nasionál, ne’e la’ós ha’u mesak de’it,” Prezidente Tribunál Rekursu informa ba jornalista sira, hafoin kumprimenta Prezidente Parlamentu Nasionál Aniceto Longuinhos Guterres Lopes, iha uma fukun, kuarta ne’e.

Estabelesimentu ne’e bele konkretiza tenke hetan apoia másimu hosi Parlamentu Nasionál, Governu no Prezidente Repúblika.

PTR Deolindo dos Santos nia prioridade ida tán mak lei organizasaun judisiáriu ne’ebé ko’alia kona-ba juis no prokuradór sira-nia estatutu maibé oras ne’e hahú deskute ona iha Parlamentu Nasionál.

Prioridade daruak mak, kestaun rekursu umanu ne’ebé seidauk sufisiente iha Tribunál Rekursu entaun presiza halo rekrutamentu ba juis sira, ofisiál justisa no funsionáriu sira iha tribunál atubele hetan númeru ne’ebé natoon maibé presiza formasaun kontinuasaun ba oifisiál sira.

Prioridade ikusliu mak hakarak hakbesik justisa ba populasaun sira-ne’ebé durante ne’e la konsege lori ba to’o iha-ne’ebá tanba kestaun osan, distánsia entaun hala’o tribunál movel maibé ho despeza boot no la permanente.

“Ne’e mak ha’u-nia prioridade atu alarga tán primeira instánsia ne’e iha fatin rua ka tolu hanesan ne’e maibé tenke apoia hosi órgaun soberania sira hotu,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here