Profesionál saúde prepara hela ekipamentu hodi halo teste swab iha CCD, tersa (27/04). Imajen TATOLI/António Gonçalves

DILI, 05 maiu 2021 (TATOLI)—Maske pesoál saúde sira fó-aan ba risku iha vijénsia propagasaun surtu COVID-19 tanba la hetan kooperasaun di’ak hosi ema balun maibé juramentu profisionál obriga hatudu korajen ultrapasa situasaun hirak ne’e.

Notísia Relevante: AETL-AMTL husu PN kria lei asegura serbisu profisionál saúde sira

“Iha situasaun pandemia COVID-19 ne’e, pesoal saúde sira fó-aan ba risku tanba haree hosi atendementu sira-ne’e dalabarak iha risku boot tebes. Maibé profisionál sira nafatin iha korajen no la hamate espíritu atubele fó asisténsia ba pasiente sira, maske iha terrenu ema balun la koopera,” Prezidente Asosiasaun Emfermeiru Timor-Leste (AETL) José Dionísio Ximenes, informa ba jornalista sira hafoin audiénsia ho Prezidente Parlamentu Nasionál, Aniceto Guterres, iha uma fukun, kuarta ne’e.

Iha pandemia COVID-19 ne’e, pesoál saúde sira balun afetadu ba COVID-19 ne’e la ba uma maibé izola-aan de’it iha fatin izolamentu sira.

“Ida-ne’e hatudu katak risku boot maibe juramentu profisionál ne’ebé iha-ne’e respeita nafatin, hodi presta sira-nia knaar iha tempu agora bainhira populasaun sira presiza sira-nia tulun,” nia akresenta.

Entretantu, Prezidente Asosiaun Médiku Timor-Leste (AMTL), Andre Monteiro, realsa profisionál saúde sira iha risku boot tebes ba kualkér moras bainhira halo atendimentu ba pasiente sira.

“Kona-ba situasaun agora ne’e, ita haree fiar hosi ita-nia pasiente no populasaun barak mak dúvida. Tanba, buat ruma akontese iha ospitál ka klínika sempre temi mak médiku sira mak bosok, ne’ebé ami iha posibilidade boot ba hetan risku,” nia informa.

Nia fó-sai katak, risku seluk mak agresaun fíziku no mós agresaun verbál ne’ebé ladún di’ak ba membru sira, ne’e psikolojikamente bele afeta ba sira-nia servisu maibé nunka lakon vontade ba servisu tanba iha juramentu ba kualkér presaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here