Sekretáriu Estadu Juventude no Desportu, Abrão Saldanha. Imajen SEJD/Dok.

DILI, 05 maiu 2021 (TATOLI) – Sekretária Estadu Juventude no Desportu (SEJD)  ezekuta  Orsamentu Jerál Estadu (OJE) 2021 nian foin  atinje 20%.

Alokasaun OJE 2021 nian ba SEJD ho montante millaun $9,476.147 atu realiza ninia programa iha primeiru semestrál. Maibé ho pandemia COVID-19, SEJD foin mak ezekuta de’it programa tolu ho persentajen ezekusaun 20%.

Sekretáriu Estadu Juventude no Desportu (MEJD) Abrão Saldanha, kuarta ne’e, informa  ba Agência Tatoli katak iha primeiru semestrál SEJD mantein de’it funsionamentu normál sira mak hanesan apoiu fundus operasionál bá organizasaun desportiva-sira, halo levantamentu no estudu, aselera apoiu atividade ba joven sira iha suku kona ba inisiativa empreendedorizmu hodi kontribui rekuperasaun reziliénsia iha komunidade.

“Ami nia programa la’ós maka tolu ne’e de’it, maibé iha programa lubuk ida mak atu realiza iha primeiru semestrál ne’e maibé tanba pandemia global COVID-19 ne’e mak ami tenke define de’it programa ne’ebé mak bele halo iha primeiru semestrál ne’e,” Abrão Saldanha  informa iha edifísiu MEJD Vila Verde, Dili, kuarta ne’e.

Nia afirma katak programa ne’ebé mak labele realiza iha ámbitu pandemia COVID-19 kabe bá area desportu nian mak hanesan kampeonatu nasionál, partisipasaun para olímpika iha Japaun, liga futeból, festival nasionál desportiva, jogu komunitária no jogu eskolár.

Agora iha area juventude nian ne’ebé la konsege realiza maka akampamentu ba joven sira hadomi natureza, akampamentu ba ICT formasaun teknolójika  no festival ba joven sira

Abrão Saldanha garante katak ba ejekusaun segundu semestrál ne’e ninia parte sei esforsu atinje 50%. Maibé se karik la konsege bele hasa’e tan 20% iha segundu semestrál ne’e.

Jornalista : Tomé Amado

Editór : Francisco Simões

HAKEREK NO HATÁN

Please enter your comment!
Please enter your name here