Xefe Sentru Saúde Liquiça no mós responsavel másimu ba vasinasaun Munisípiu Liquiça, Beatris Filomena dos Santos. Imajen Tatoli/Hortencio Sanchez

LIQUIÇA, 05 maiu 2021 (TATOLI) – Xefe Sentru Saúde Liquiça, Beatris Filomena da Silva dos Santos, hateten daudauk ne’e sentru saúde iha Liquiça sei iha difikuldade ba parteira tan númeru seidauk sufisiente hodi halo servisu.

“Agora iha Liquiça pesoál ka parteira ne’e menus tebes hodi halo servisu, nai ulun sira bele loke netik vaga ruma hodi kolega parteira sira hodi konkorre tanba ita nia inan isin-rua sira presiza parteira sira nia tulun,” Beatris Filomena da Silva hateten ba Agência Tatoli iha Liquiça, kuarta ne’e.

Nia dehan, pesoál parteira la sufisiente tanba postu saúde iha Liquiça vila hamutuk neen, maibé parteira iha de’it postu rua no postu seluk seidauk iha parteira.

“Ita agora iha postu neen, maibé so postu rua de’it mak iha parteira, maibé parteira rua ne’e mós internatu entaun koloka de’it sira ba iha Postu Leotela no Darlete iha fulan abríl tinan kotuk,” nia dehan.

“Kada loron konsulta ba inan isin-rua sira barak tebes, kada semana ami mós fó konsulta ba inan isin-rua sira ne’ebé bolu maubael klínika, hosi janeiru to’o mai agora inan isin rua sira ami fó konsulta no balu partus ona hamutuk 120 ne’ebé durante ne’e ita fó konsulta iha ne’e,” nia haktuir.

Nia hatutan, inan isin rua hirak ne’e maioria ho kondisaun ne’ebé di’ak tebes no balun sente ladi’ak  ka grave fó konsola ba sira atu kuidadu sira-nia saúde tanba agora daudauk situasaun Serka Sanitaria labele haruka inan isin-rua sira ba Dili no sentru Liquiça tenta ho ekipamentu ne’ebé natoon halo atendimentu.

 Loron Mundial Parteira

Iha loron 05 maiu hanesan mós loron mundiál ba parteira, iha ne’ebé parteira hotu iha mundu komemora loron ne’e, maibé iha Timor – Leste hasoru hela pandemia Covid-19 labele selebra hanesan tinan sira ba kotuk.

“Parabéns ba ha’u nia maluk parteira hotu iha mundu no espesiál iha rai doben ida ne’e, forsa nafatin hodi hala’o ita nia knar hodi serve ba ita nia povu no ita nia nasaun,” Beatris hateten.

Hanesan ema parteira ne’ebé  servisu kleur ona iha area parteira to’o asume kargu xefia hanesan Xefe Sentru Saúde Liquiça sente kontente tebes ho profisaun ne’ebé nia halo tanba la’ós salva de’it ema ida maibé salva ema na’in rua nia vida.

“Durante ha’u sai hanesan parteira sente kontente tanba ha’u bele ajuda ema na’in rua, ajuda inan ajuda mós oan,” nia tenik.

Númeru IRA as iha Liquiça

Xefe Sentru Saúde Liquiça, Beatris Filomena da Silva dos Santos, informa hahú hosi janeiru to’o agora númeru moras ne’ebé as mak infesaun respiratóriu aguda (IRA).

Nia dehan, total númeru hosi pasiente ne’ebé afetadu ba moras IRA hamutuk 145 no laiha ida mak mate.

“Moras seluk fali mak hanesan diarreia, moras kulit sira ne’e no moras sira seluk hanesan tensaun ba ita nia inan aman sira idade 50 ba leten,” nia hateten..

Hanesan lider iha sentru saúde Liquiça nia apela nafatin ba komunidade bainhira moras tenke hakbesik an nafatin ba sentru saúde sira ne’ebé besik hodi halo tratamentu.

Jornalista   : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here