Vise-Ministru Interiór, António Armindo. Imajen TATOLI/Egas Cristóvão

DILI, 05 maiu 2021 (TATOLI)–Ministériu Interór (MI) hamutuk ho Organizasaun Internasionál ba Imigrasaun (IOM, sigla inglés) halo ona enkontru inisiál atu diskute estabelesementu plataforma online integradu iha Timor-Leste hanaran Border Management Information System (BMIS).

Primeiru-Ministru no Ministru InteriórM Taur Matan Ruak, fó orietasaun atu buka estabelese sistema online integradu atu haforsa jestaun fronteira no kontrolu migratóriu.

“Ha’u enkontru ona ho IOM maski seidauk 100%, maibé ita hetan ona apoiu fundu hosi Governu Austrália no Uniaun Europeia (UE) atu ajuda IOM hodi estabelese ita-nia sistema online intergradu,” Vise Ministru Interiór, António Armindo hateten iha edifisíu Ministériu Finansa, Aitarak-laran, Dili, kuarta ne’e.

Governante ne’e dehan, ba faze dahuluk instalasaun sei presiza millaun $1,5, ne’ebé mai hosi Governu Austrália no UE.

“Sistema ne’e atu fasilita timor-oan bainhira atu ba Austrália karik, to’o iha aeroportu, ofisiál sira sei la tau karimbu maibé haree de’it pasaporte, tanba sistema ne’e permite ita tama ona sira-nia territóriu, hafoin sira monitoriza ita durante ita iha sira-nia rai,” governante ne’e esplika.

Nune’e, Governu hakarak sistema ne’e aplika iha Timor-Leste, maibé presiza husu apoiu ajénsia internasionál sira, tanba ne’e hato’o apresiasaun ba IOM tanba hakarak apoia halo jestaun fronteira no kontrolu migratóriu, tantu iha kontinente Áfrika, Médiu Oriente, Europa no Norte Ámerika rasik.

Nune’e mós, Governu iha intensaun atu promove kooperasaun hodi hadi’a kapasidade servisu migrasaun tanba halo ona esforsu no fó prioridade hodi fortalese setór jestaun fronteira sira, liuliu infraestrutura, formasaun rekursu umanu no teknolójia.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here