Vise-Ministru Interiór, António Armindo. Imajen TATOLI/Egas Cristóvão

DILI, 05 maiu 2021 (TATOLI)—Ekipa téknika informasaun téknolojia hadi’a ona sistema eletrónika migrasaun iha fronteira sira hodi fasilita halo rejistu ba sidadaun sira ne’ebé tama-sai territóriu nasionál.

“Sistema dijitalizasaun fronteira avaria ona durante semana ida no ita rezolve ona tanba ita rekruta tékniku ne’ebé  hadi’a hotu ona. Daudaun ne’e migrasaun sira utiliza rejistu sidadaun sira ne’ebé tama-sai mai fronteira sira,” Vise Ministru Interiór, António Armindo, informa iha edifísiu Ministériu Finansa, Aitarak-laran, kuarta ne’e.

Durante ne’e, servisu migrasaun hala’o ho sistema jestaun fronteira atu rejista sidadaun sira ne’ebé tama no sai iha área fronteira.

Tuir governante ne’e, importante mak hadi’a lalais mákina sistema dijitalizasaun.

“Ami haruka mós ita-nia tékniku hadi’a hotu mákina dijitaliazasaun iha aeroportu, iha fronteira Mota-ain, Sakato no Suai-Salele atubele rejistu sidadaun sira iha sistema hodi fasil buka tuir ka monitoriza,” nia akresenta.

Governu monta ona sistema rejistu eletróniku iha área fronteira sira no aeroportu atu  hafasil autoridade sira, bainhira ema estranjeiru no timor-oan balun tama territótiu nasionál no komete krime, bele buka tuir ho lalais.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here