Diretór Agró- Komérsiu no Kooperasaun Setór Privadu, hosi MAP, Fernando Egidio Amaral. Imajen/Natalino Costa

DILI, 05 maiu 2020 (TATOLI)–Ministériu Agrikultura Peska (MAP), liuhosi Diresaun Agro-Komérsiu no Kooperasaun Setór Privadu, servisu hamutuk ho Embaixada Indonézia, sei fó formasaun iha área diversifiksaun nuu.

“Ha’u rasik maka husu sira atubele fasilita formasaun ida ba setór privadu, instituisaun relevante no parseiru sira atu haree investimentu iha nuu ne’ebé sei sai indústria boot atu responde ba krize ai-han ne’ebé mak ita hasoru tanba populasaun idade tinan 25 to’o 50 aumenta ba bebeik,” Diretór Agro-Komérsiu no Koopersaun Setór Privadu Ministériu Agrikultura no Peska, Fernando Egidio Amaral, informa ba Agência TATOLI, via telefónika, kuarta ne’e.

Tanba ne’e, MAP halo hela preparasaun tékniku tanba formasaun ne’ebé foku ba produsaun no indústria iha merkadu sei iha ninia kontinuidade.

Nia esplika, iha formasaun produsaun sei foka no fó importánsia ba agrikultura no hasa’e koñesimentu formandu kona-ba prátika agrikultura kuda nuu no prátika agrikutura hodi diversifika ai-han nutrisaun ho materiál prima nuu.

Tuir Diretór ne’e, formasaun sei envolve péritu sira hosi Indonezia Tailándia.

“Ita hatene Tailándia ne’e nu’udar nasaun avansadu iha smart agriculture, ho ida-ne’e péritu no instrutór sira sei fó matéria kompletu iha formasaun hodi bele implementa iha prátika agrikultura di’ak, liu-liu atu kuda nuu ba oin no bele fó benefísiu ba ita,” nia akresenta.

Entretantu, formasaun kapasitasaun iha diverifikasaun nuu sei realiza hahú loron 20 maiu liuhosi vídeo konferénsia. 

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here