Ambulánsia ne’ebé oferese hosi Japaun, para hela iha resintu MS, Caicoli. Imajen Tatoli/Felicidade Ximenes.

DILI, 05 maiu 2021 (TATOLI)—Governu Japaun oferese ambulánsia unidade 38 ba Governu Timor-Leste (TL), liu hosi Ministériu Saúde (MS), atu bele fasilita serbisu perante situasaun COVID-19.

“Ambulánsia hirak-ne’e sei distribui ba munisípiu hotu inklui RAEOA, atu bele tula pasiente COVID-19 no mós ba serbisu ensensiál-sira seluk,” Diretór Jerál Serbisu Kooperativa, MS, Marcelo Amaral, hateten ba jornalista Agência Tatoli, iha Caicoli, kuarta ne’e.

Notísia relevante:MS distribui ambulánsia 11 ba Munisípiu sanulu

Maski la esplika detalla kona-bá kooperasaun entre Governu rua hodi apoia ambulánsia hirak-ne’e, maibé Marcelo Amaral, esplika, entre unidade 38 ne’e, MS oferese ona unidade ida ba Sekretária Estadu Protesaun Sivíl (SEPS), unidade 11 mak oras-ne’e iha hela resintu Ministériu Saúde, unidade 10 mak sei iha hela Portu Dili no unidade 16 mak sei iha dalan.

Tanba ne’e, unidade 11 ne’ebé iha ona resintu MS, sei distribui ba munisípiu hotu-hotu, eseptu munisípiu Aileu ho RAEOA.

“Ita sei koloka mós unidade ida ba Serbisu Nasionál Ambulánsia Emerjénsia Médika,” nia esplika.

Tuir planu, ambulánsia unidade 11 ne’ebé iha hela resintu MS, sei distribui iha kinta 06 maiu 2021.

Notísia relevante:Governu uza ambulánsia rua hodi transporta pasiente COVID-19

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here