Membru Unidade Polisia Fronteira (UPF) no FALINTIL Forsa Defeza Timor-Leste (F-FDTL) blokea estrada iha área Postu Administrativu Tilomar hodi evita abitante sira halo viazen hosi Suai ba Fatumea.Imajen/Tatoli/Eugénio Pereira

DILI, 05 maiu 2021 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, hateten to’o oras ne’e Governu seidauk hasai rezolusaun kona-ba F-FDTL atu partisipa no halo intervensaun ba atividade COVID-19 nian maibé iha ona diretiva konjunta atu F-FDTL no PNTL halo seguransa iha rai-laran.

Notísia Relevante: Rekrutamentu F-FDTL sei realiza iha fulan-agostu

“Partisipasaun F-FDTL nian iha situasaun atuál ida-ne’e, ha’u hanoin katak Governu seidauk hasai rezolusaun ida kona-ba F-FDTL atu partisipa no halo intervensaun ba atividade COVID-19 ninian. Maibé, kona-ba seguransa ba situasaun atuál ida-ne’e, F-FDTL no PNTL iha ona diretiva konjunta atu halo seguransa ba ita-nia rai-laran,” Tenente Jenerál Lere Anan Timur informa ba jornalista sira hafoin ramata enkontru semanál ho Xefe Estadu iha Palásiu Prezidensiál Nicolau Lobato, Bairru Pite, Dili, kuarta ne’e.

Governu hateten F-FDTL no PNTL servisu hamutuk ne’e sein dúvida iha kampu tátiku operasionál tanba Komandante hosi instituisaun rua (F-FDTL no PNTL) mak sei haree ba kestaun ida-ne’e.

Tanba ne’e, Lere Anan Timur, apela ba populasaun sira liuliu ba juventude sira atu koopera no kontribui ba servisu F-FDTL no PNTL nian, iha ámbitu fó seguransa ba populasaun sira iha propagasaun COVID-19 ne’e.

Iha biban ne’e, Tenente Jenerál Lere Anan Timur hamutuk ho Komandante Jerál Polísia Nasionál Timor-Leste (PNTL), Komisáriu Faustino da Costa, infroma mós ba Xefe estadu kona-pandemia COVID-19 iha Timor-Leste.

“Ohin, ami informa situasaun rai-laran no liuliu kona-ba COVID-19 ne’ebé halo ema barak la kontente,” Lere Anan Timur hateten.

Tanba ne’e mak instituisaun rua (F-FDTL no PNTL) sempre koopera hamutuk hodi kontinua halo seguransa ba situasaun propagasaun COVID-19, maske dala ruma mosu juventude no populasaun balun kontra polísia ninia atitude oinsá halo intervensaun iha terrenu.  

“Populasaun halo auto-krítika ba PNTL-FFDTL atu ba la halo, maibé instituisaun rua ne’e hala’o nafatin knaar hodi no kaer nafatin ninia misaun tuir lei no orden,” Lere dehan.

Tenente Jenerál Lere Anan Timur husu ba joven sira no komunidade atu komprende situasaun COVID-19, tanba bainhira Estadu no Governu la jere didi’ak situasaun ida-ne’e bele halo ema hanoin barak, deskontente tanba la fiar ema ida hela metin iha uma-laran semana ida-rua ne’e la aguenta.

“Maibé, ha’u hanoin katak aban bainrua ita-nia Governu sei toma medida kona-ba situasaun konkreta COVID-19 ninian,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here