Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (05/05). Imajen TATOLI/Egas Cristóvão

DILI, 05 maiu 2021 (TATOLI)—Reuniaun Konsellu Ministru (KM) halo deliberasaun hodi atribui podér tomak ba Ministru Finansa, Rui Augusto Gomes, hodi asina akordu kontribuisaun finanseira entre Timor-Leste no Estadu Unidu Amérika (EUA), ne’ebé reprezenta hosi United States Agency for International Development (USAID).

“Akordu ne’e estabelese realizasaun kontribuisaun finanseira ida hosi Estadu Unidu Amérika ba Timor-leste ho valór $ 17.900.000, ba fortalesimentu setór naun petrolíferu no ba reforsu boa governasaun nian,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha salaun Ministériu Finansa, Aitarak-laran, kuarta ne’e.

Portavóz Governu esklarese, akordu ne’e prevee mós posibilidade kompleta kontribuisaun ne’e, depende hosi kapasidade orsamentál doadór, liuhosi kontribuisaun adisionál sira to’o montante totál estimadu $92.300.000.

“Kontribuisaun adisionál sira-ne’e karik akontese, iha futuru sei presiza halo akordu ba kontribuisaun finanseira ida-idak,” governante ne’e subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here