Akordu 05 maiu 1999. Imajen/Dok.CNC

DILI, 05 maiu 2021 (TATOLI)-Diretór Centro Nasionál Chega (CNC), Hugo Maria Fernandes, husu lider-sira atu orgullu ba sira-nia an no valoriza loron 05 maiu tanba liuhosi loron ida-ne’e mak bele hala’o konsulta populár hodi hakotu timor-oan nia direitu luta ba ukun rasik-an.

“Ha’u hanoin, ohin, lider-sira tenke orgullu ba sira-nia an, liuliu lider-sira ne’ebé mak iha tinan 1975 lidera prosesu luta ba Timor-Leste nia ukun rasik-an ka auto determinasaun, tanba loron 05 maiu, nu’udár loron dahuluk Timor-Leste ne’ebé Portugál reprezenta tuur hamutuk ho Indonézia iha Sekretáriu Jerál ONU nia oin asina akordu atu hakotu tiha violénsia ne’ebé naruk, fó resposta ba sira-nia luta ne’e,” Hugo Maria Fernandes hateten ba Agência Tatoli liuhosi telefónika, kuarta ne’e.

Nia hatutan, iha ámbitu ukun rasik-an ida-ne’e lider la’ós orgullu de’it, maibé loloos tenke fó omenajen ida ba sira nia-an rasik no ba ema sira ne’ebé mate durante iha tinan 24 nia laran tanba loron ida ne’e, determinante ba luta ba ukun rasik-an.

Diretór Ezekutivu Centro Nasionál Chega (CNC), Hugo Maria Fernandes, haklaken katak  loron 05 maiu, importante tebes ba Timor-Leste tanba atu halo reflesaun hosi  akordu 05 maiu 1999 ne’e mak determina ka hakotu Timor-oan nia direitu luta ba auto determinasaun.

Diretór CNC ne’e dehan, loron 05 maiu importante tanba Portugál nu’udár podér Administrativu iha Timor, tuir rezolusaun Organizasaun Nasaun Unida (ONU) nian, no mós Indonézia nu’udár país okupante ne’ebé mak halo aneksasaun mai Timor-Leste iha 1975, tuur hamutuk asina akordu ne’ebé mak sai nu’udár modalidade ba halo konsulta popular iha 30 agostu 1999.

“Ha’u hanoin katak loron ohin importante tebes ita hotu halo reflesaun ida ba loron ohin halo tinan 22 ba akordu 05 maiu 1999 ne’ebé mak determina ka hakotu timor-oan nia direitu luta ba auto determinasaun hodi hetan ukun rasik-aan, tanba ne’e hakarak ka lakohi ita tenke sura mós ho loron 05 maiu,”  Hugo Maria Fernandes hateten.

Jornalista      : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here