Kondisaun uma ne’ebé sofre ba inundasaun iha área Masin-lidun Tasi-tolu. Imajen Tatoli/António Gonçalves.

DILI, 05 maiu 2021 (TATOLI)—Governu Australianu oferese espesialista na’in-rua hodi fó asisténsia téknika ba Sekretária Estadu Protesaun Sivíl (SEPS), durante situasaun kalamidade.

Diretór Jerál SEPS, Superintendente Asistente Polísia, Ismael Babo, hateten espesialista na’in-rua ne’e, ida iha área espesialidade ba jestaun  emerjénsia hodi responde ba dezastre naturál, mobiliza rekursu sira ho efisiénsia no efikas. Ida seluk, espesialista iha área enjeñaria sivíl ne’eb’e sei halo estudu ba área risku dezastre iha territóriu.

Notísia relevante:Família 6.000 iha Dili hetan ona apoiu emerjénsia hosi SEPS

“Ho dezastre naturál ne’ebé akontese, Governu Austrália apoia peritu na’in-rua  sei serbisu hamutuk ho SEPS durante fulan ne’e, hodi fo asisténsia téknika,’’ Ismael Babo, hateten ba jornalista Agência Tatoli iha nia kna’ar fatin Caicoli, kuarta ne’e.

Razaun Timor-Leste presiza apoiu asisténsia téknika, tanba SEPS haree katak, Austrália  iha esperiénsia barak ne’ebé sira ultrapasa ona dezastre boot hanesan inséndiu, inundasaun ho siklone.

Tanba ne’e, péritu na’in-rua sei kompartilla serbisu ho protesaun sivíl  hodi eleva kapasidade hasoru situasaun atuál no  futuru, bainhira akontese dezastre naturál bele halo atuasaun ho di’ak liu-tan.

“Ita agradese hodi bele serbisu hamutuk kompartilla ho ambiente lokál, ajusta hodi hadi’a preparasaun iha futuru no atendimentu ne’ebé daudaun ne’e halo ba komunidade,’’ nia subliña.

Durante ne’e mós, Organizasaun Nasaun Unida (ONU) no  parseiru internasionál no sosiedade sivíl sira serbisu hamutuk ho SEPS hodi fó asisténsia iha prevensaun dezastre no mós halo levantamentu dadus família afetada.

Tuir dadus hosi Ministériu Administrasaun Estatál (MAE), dadaun ne’e rejista família afetada ba dezastre naturál aumenta  ba   33.177 iha territóriu Timor-Leste (TL), no hosi númeru ne’e família  besik 90% mak hosi Dili no 10% hosi Munisípiu.

MAE hamutuk ho protesaun sivíl no parseiru halo ona levantamentu dadus iha uma 25.000 mak afetadu, uma 24.000 aat kamán, aat natón 553 no aat totál 554.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here