Atividade iha fronteira terrestre iha Mota-ain, iha loron 26 juñu 2020. Imajen TATOLI/António Gonçalves

DILI, 05 maiu 2021 (TATOLI)--Ministériu Interiór (MI) rejista hahú hosi fulan abríl to’o maiu, ema hamutuk na’in-19 mak halo pasajen ilegál liuhosi fronteira terrestre tama ba territóriu nasionál.

Vise Ministru Interiór, António Armindo, hateten, durante ne’e Polísia Nasionál Timor-Leste (PNTL) liuhosi Unidade Polísia Fronteira (UPF, sigla portugés) asegura metin fronteira terrestre sira entre Timor-Leste ho Indonézia hodi evita pasajen ilegál, maski ema balun sei tenta tama nafatin.

“Semana ida ne’e (maiu) ita foin rejista ema tama ilegál na’in-ida de’it no fulan kotuk (abríl) ita iha na’in-18, ne’ebé númeru ne’e hahú redús ba daudaun, signifika ita-nia seguransa hahú metin atu asegura fronteira,” Vise Ministru hateten iha edifísiu Ministériu Finansa, Aitarak-laran, kuarta ne’e.

Daudaun ne’e, Governu foku ba kontrolu másimu iha fronteira terrestre no kontinua fó dalan ba sidadaun sira ne’ebé hakarak fila liuhosi dalan legál.

“Ita-nia Konstitusaun Repúblika garante katak bainhira ita-nia sidadaun tama mai, labele rejeita maibé ita kontinua kontrola sira no bainhira tama mai tenke ba kuaretena durante loron 14. Ita halo ba ema ne’ebé tama ilegál no legál tenke kuarentena hotu,” nia akresenta.

Aleinde ne’e, Governu kontinua autoriza movimentu merkadoria la’o nafatin, iha kada loron segunda tama mai Timor-Leste no sai iha kada kuarta.

Sei harii postu 12 iha fronteira terrestre

Governu mós kontinua toma medida ba pasajen ilegál sira iha fronteira terrestre, ne’ebé sei kontinua harii tan postu 12 ba UPF hodi kompleta postu 30-resin ne’ebé harii ona.

“Semana ne’e, ha’u ho Primeiru-Ministru sei ba inaugura tan postu haat ne’ebé Governu Austrália ajuda no finaliza ona konstrusaun atu aumenta tan númeru postu iha fronteira, nune’e bele asegura di’ak liután,” nia akresenta.

Governu Austrália liuhosi Embaixada Austrália iha Timor-Leste ho programa Timor-Leste Police Development Programme (TLPDP), ne’ebé Governu mós tau tan osan ba tinan ne’e atu konstrui fali postu foun ualu.

Postu haat ne’ebé Governu Austrália apoiu ne’e harii iha Oefauk, Anin-matan no seluk tan inklui planu atu monta postu ida iha Agrema-Ataúro tanba ema ilegál mai hosi Liran-Indonézia  tama-mai Ataúro.

Liuhosi programa parseiru dezenvovlimentu sei instala solár panél no fura bee hodi bele fasilita membru UPF ne’ebé koloka ba postu sira.

Governu mós sei halo levatamentu hodi kontinua hadi’a postu sira iha fronteira iha área Oé-cusse hanesan Sakato no Oésilo, iha minisípiu Maliana hanesan Tunu-Bibi no Mota-ain no área Suai hanesan Salele.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here