Vasina AstraZeneca doze dahuluk ne’ebé pesoál liña frente-sira simu. Imajen Tatoli/António Gonçalves.

DILI, 04 maiu 2021 (TATOLI)Ministra Saúde, Odete Maria Freitas Belo, informa, Governu Timor-Leste sei simu vasina ho tipu AstraZeneca hosi Austrália hamutuk doze 10.000, ne’ebé to’o kuarta aban (05/05) tuku 11:00 iha Aeroportu Internasionál Prezidente Nicolau Lobato, Comoro, Dili.

“Aban (tersa) ita sei simu vasina ho tipu hanesan (AstraZeneca) hosi Austrália hamutuk doze 10.000, la’ós hosi COVAX Fasility maibé hanesan apoia hosi kooperasaun bilaterál entre país rua,” Ministra Odete Maria, relata ba Jornalista sira hafoin ramata reuniaun ho Primeiru-Ministru (PM), Taur Matan Ruak, iha Eezidénsia Faról, tersa ne’e.

Notísia relevante: Ema hamutuk 28.678 simu ona vasina AstraZeneca

Ministra dehan, vasina ne’ebé sei mai, fó prioridade liu ba ema ne’ebé mak sofre moras diabetes, HIV/SIDA no TBC, inklui hirak ne’ebé idade 60 ba leten, tanba ema sira ne’e konsidera risku a’as ba vírus.

“Ita hatene katak daudaun ne’e ita rejista kazu infetadu COVID-19 a’as liu iha Dili, tanba ne’e maka vasina ne’ebé sei mai, lansa iha segunda (10/05),” nia akresenta.

Tuir planu, liuhosi apoia bilaterál Governu sei simu tan vasina doze 10.000.

“Hafoin ida ne’e, iha loron 19 maiu ne’e, ita sei hetan doze 10.000 no tempu hanesan ita mós prepara simu vasina seluk hosi COVAX Fasility ne’ebé mak data loloos seidauk serteza, ne’e vasina ho tipu Sinovac hosi Xina,” nia subliña.

Vasina AstraZeneca doze 24.000 ne’ebé mak Timor-Leste simu iha faze dahuluk hosi COVAX Fasility, ema 28.678 mak simu ona, ne’ebé kuaze kobre iha munisípiu tomak.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here