Timor-oan 16 eziji ajénsia viajen fó fila osan viajen, iha edifísiu Narpov Ateita, Fatuhada, tersa (04/05). Imajen TATOLI/ Natalino Costa

DILI, 04 maiu 2020 (TATOLI)–Timor-oan na’in-16 ne’ebé antes ne’e la konsege to’o fatin destinasaun bazeia ba billete ne’ebé sosa ona ho destinasaun Dili-Inglaterra, husu ajénsia viajen Narpov Ateita hodi devolve osan.

Timor-oan hirak ne’e konsege halo viajen to’o de’it iha Kuala Lumpur, Malázia (fatin tránzitu) no labele kontinua voo tanba falla iha prosesu administrasaun, maibé iha loron 24 abríl konsege filafali mai Dili ho ajuda hosi Responsável ba ekipa Fly Timor, Pedro M. Carrascalão, Embaixada Timor-Leste iha Malázia no Malino Air.

Armanda de Fátima Soares Doutel, hanesan pasajeiru lamenta ho desizaun diretór ajénsia viajen Narpov Ateita, tanba fó ko’a osan viajen.  

“Ami na’in-16 atu dehan katak iha akordu ne’ebé ami halo iha Polísia, katak ajénsia sei devolve ami-nia osan ohin loron, ne’ebé ami hotu marka prezensa iha ne’e atu mai foti ami-nia osan, maibé ikus mai dehan sei ko’a ami-nia osan $500 ou $250. Ida-ne’e ami la simu, tanba ami seidauk halo check-in no laiha boarding pass,” Armanda dehan ba Agência TATOLI, iha edifísiu Narpov Ateita, Fatuhada, tersa ne’e.

Notísia relevante: Timor-oan 35 husu ajénsia viajen Narpov Ateita devolve osan viajen

Tanba ne’e, pasajeiru sira ezije ajénsia viajen Narpov Ateita devolve osan billete kompletu.

“Ami-nia sosa billete $1.995 inklui teste COVID-19 no fasilidade iha aviaun, maibé la konsege, check-in no boarding pass mós la konsege. Imigrasaun kansela ami-nia viajen, tanba ne’e agora ami ezije fó ami-nia direitu tomak,” nia subliña.

Liga ho kestaun ne’e, jornalista tenta konfirma ho responsável ajénsia viajen, maibé lakohi fó komentáriu ho razaun okupadu.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here