Diretora Timor-Post, Suzana Cardoso (klaran). Imajen/Espesiál.

DILI, 04 maiu 2021 (TATOLI)–Diretora Timor-Post, Suzana Cardoso, hateten jornalista Timor-oan labele baruk atu aprende hodi sai profísional liután iha mundu jornalizmu atu liberdade imprensa ne’e bele atinje iha Timor-Leste, no bele fó hanoin ukun-na’in sira atu ukun tuir sira nia kompromisu iha tempu kampaña eleisaun nian ne’e sai realidade.

Zuzana Cardoso hatutan, liberdade imprensa iha nasaun ne’ebé de’it bazea ba kualidade edukasaun no ekonomia nasaun ne’e nian.

“Iha komemorasaun loron Mundiál Liberdade Imprensa ne’e, ha’u husu jornalsita Timor-oan sira atu labele baruk aprende hodi sai jornalista ne’ebé profísional liután iha mundu jornalizmu nian,” Diretora Timor Post ne’e hateten ba Agência Tatoli, liuhosi WhatsApp, tersa ne’e.

Atu garante Liberdade imprensa liuliu liga ba jornalista sira-nia responsabilidade hodi garante informasaun ba públiku liuhosi kobertura iha terrenu, Suzana Cardoso hateten, Timor Post nia polítika nafatin garante liberdade ne’e hodi halo check and balance ba informasaun sira-ne’ebé jornalista sira rekolla hodi públika.

Diretora Timor-Post, Suzana Cardoso (klaran). Imajen/Espesiál.

Hatán kona-ba rezultadu analize hosi Conselho de Imprensa ne’ebé hatudu katak jornalista Timor-oan nia kualidade monu makaas ne’e, Diretóra Timor Post ne’e la konkorda tanba uitoan ka barak jornalista sira kontribui ona hodi hato’o informasaun ba públiku liuhosi kapasidade intelektuál ne’ebé jornalista ida-idak iha.

“Jornalista nia kualidade sai lalenok hosi kualidade edukasaun tanba ida-ne’e parte ida hosi intelektualidade. Conselho de Imprensa bele dehan jornalista laiha kualidade hodi kompara ho joranlista sira uluk nian, maibé loloos ne’e jornalista agora nian mós iha kualidade hodi hato’o informasaun ho loloos ba públiku,” nia dehan.

Jornalista antigu ne’e hateten, impase polítika no pandemia COVID-19 ne’ebé akontese iha Timor-Leste ne’e afeta ba jornalista timor-oan balun tenke lakon serbisu, tanba impase polítika ne’ebé afeta ba ekonomia rai laran no afeta mós ba Empreza Timor Post hodi hapara ninia empregadu lubuk ida.

“Ba ha’u, jornalista lakon sira nia servisu ne’e tanba impasse politik no inkapasidade atu dezenvolve ekonomia rai laran. Iha Timor Post, ami hapara ona empregadu barak tanba impase politika ne’ebé naruk demais no kleur liu,” nia dehan.

Notísia Relevante: SEKOMS enkoraja jornalista hadi’a produtu jornalizmu

Jornalista: Domingos Piedade Freitas

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here