Ekipa médiku kontinua halo teste swab. Imajen Tatoli/Egas Cristóvão.

DILI, 04 maiu 2021 (TATOLI)—Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste (TL), Rui Maria de Araújo, hateten durante loron tolu hahú hosi 01 to’o 03 maiu, ekipa Saúde na Familia (SnF) hala’o Sentinela Ativa ka Active Case Finding, hodi buka-tuir no deteta kazu pozitivu iha bairru no aldeia iha Dili laran, deteta pozitivu 20 hosi amostra 201.

“Iha loron tolu nia laran, ekipa SnF foti amostra hirak ne’e, halo Rapid Antigen Test, hafoin konfirma ho teste PCR,” Rui Maria de Araújo, hateten liu hosi komunikadu, iha tersa ne’e.

Notísia relevante:COVID-19: pozitivu 129, rekoperadu 69 no ativu 1.315

Nia esplika, hosi na’in 20 ne’ebé pozitivu hanesan ho 9,9% konsistente ho taxa prevalénsia ne’ebé fó-sai ona loron hirak liu bá.

Tanba ne’e, sira ne’ebé pozitivu iha opsaun rua, opsaun ida maka halo izolamentu iha fasilidade ne’ebé Estadu prepara,  no opsaun seluk maka halo autoizolamentu.

“Bainhira sira-nia uma prienxe kondisaun mínimu, ekipa SnF ho líder komunitáriu-sira mak monitoriza no halo fiskalizasaun ba kumprimentu regra autoizolamentu,”

Ekipa SnF iha Munisípiu Dili sei kontinua serbisu hodi implementa mekanizmu Sentinela Ativa ka Active Case Finding iha bairru no aldeia-sira.

Sala Situasaun Sentru Integradu Jestaun Krize (SIJK), ohin rejista kazu pozitivu COVID-19 hamutuk 129, rekoperadu 69 no ativu 1.315.

Hosi númeru pozitivu ohin, kazu 102 detetadu iha munisípiu Dili no munisípiu seluk 27.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here