Montana Diak halo serbisu rekupera estrada iha Embaixada Japaun oin, iha Praia dos Coqueiros. Imajen/MOP

DILI, 04 maiu 2021 (TATOLI)–Progresu rekonstrusaun emerjénsia estrada protokolu ne’ebé kotu iha Embaixada Japaun oin, iha Praia dos Coqueriros, kauza hosi dezastre naturál foin lalais, kuaze konklui.

“Rekonstrusaun permanente ba estrada protokolu ne’e hala’o ho emerjénsia hosi kompañia Montana Diak, daudaun  atinji ona 70% no kompañia kontinua halo esforsu hodi finaliza iha tempu badak,” Diretór Jerál Obra  Publika hosi Ministériu Obra Públika (MOP), Rui Hernani, hateten ba Agência TATOLI, via telefónika, tersa ne’e.

Iha parte seluk, Ministru Obra Públika, Salvador Eugênio Soares dos Reis Pires, kontinua orienta tékniku sira hodi akompaña projetu emerjénsia ne’e hodi garante kualidade obra.

Kompañia finaliza ona cor moru protesaun no daudaun foku ona tau base course sentímetru 20, hafoin fui alkatraun ACBC kamada dahuluk sentímetru neen no ikus liu fui tan alkatraun ACWC ba faze daruak ho sentímetru haat.

“Ita-nia ekipa téknika kontinua halo supervizaun atu garante kualidade,” nia akresenta.

Rekonstrusaun ba estrada ne’e hahú iha loron 20 abríl 2021, hafoin hetan desizaun husi Konsellu Administrasaun Fundu Infraestrutra (KAFI) no realizasaun kontratu ba kompañia konstrutór hodi normaliza estrada ne’e ho emerjénsia.

Projetu rekuperasaun ho durasaun fulan ida no sei rematan iha fulan ne’e ho kustu obra hamutuk $134.000.

Alende ne’e, Responsável ne’e dehan, ekipa téknika husi Diresaun Nasionál Estrada, Ponte no Kontrolu Cheia (DNEPCC, sigla portugés) hamutuk ho ekipa téknika hosi Gabinete MOP, aprezenta ona Termu Referénsia Ponte Bekusi foun nian ba Ministru Salvador.

Iha aprezentasaun ne’e, Ministru orienta ekipa atu halo Termu Referénsi no dezeñu ho di’ak no tuir kondisaun mota iha terrenu, liuliu ponte Bekusi ne’ebé tinan rua tutuir malu bainhira udan boot sempre hamosu inundasaun iha área refere no estraga komunidade nia hela fatin.

Primeiru Ministru, Taur Matan Ruak, orienta atu Ministériu Planu Ordenamentu (MPO) no MOP sobu ponte tuan hodi konstrui hikas ponte foun ne’ebé kondiz ho mota Bekusi hodi labele hamosu inundasaun bainhira udan-boot.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here