Ministru Justisa, Manuel Cárceres da Costa. Imajen Tatoli/Egas Cristovão.

DILI, 04 maiu 2021 (TATOLI)—Ministru Justisa (MJ), Manuel Cárceres da Costa, hateten Timor-Leste (TL) presiza analiza didi’ak, antes atu halo akordu extradisaun ho nasaun seluk.

“Akordu extradisaun, presiza haree didi’ak tanba ita-nia Konstituisaun Repúblika bandu laiha pena  de morte. Ita bele halo akordu extradisaun, maibé kazu por kazu, ita extradita ema, iha ne’e ita respeita nia. Ezemplu, Indonézia-nian to’o iha ne’ebá hetan ezekusaun pena de morte,’’ Manuel Cárceres, hateten ba jornalista Agéncia Tatoli, iha edifísiu Ministéiru Negósiu Estranjeiru no Kooperasaun (MNEK), Praia dos Coqueiros, Dili, tersa ne’e.

Notísia relevante:La Fásil Timor-Leste Halo Akordu Extradisaun Ho Nasaun Sira

Governante ne’e dehan, presiza haree didi’ak lei hosi nasaun rua, ne’ebé tenke han-malu liu-liu ho konstituisaun kada nasaun ne’ebé atu estabelese akordu extradisaun.

Iha futuru, TL  bele halo akordu extradisaun ho  nasaun seluk, maibé  Manuel Cárceres, dehan agora  daudaun prioridade avansa uluk ho troka dadur ba ezekusaun pena.

“Tinan kotuk, Filipina hanoin atu troka dadur no Timoroan dadur iha Filipina bele mai kumpre nia sentesa iha TL no Filipina-nia sidadaun mak hetan pena iha TL bele ba kumpre iha Filipina. Maibé, foin hanoin seidauk iha realizasaun asinatura dokumentu ofisiál,”nia hateten.

Antes ne’e, Prokuradór Jerál Repúblika (PJR) sesante, José da Costa Ximenes, deklara Ministériu Públiku (MP) hato’o ona pedidu ba Tribunál Distritál Dili (TDD), atu bele halo mandatu detensaun internasionál ba suspeitu balun, ne’ebé ninia prosesu la’o hela hasoru justisa, laiha TL. Maibé, TDD ho Tribunál Rekursu (TR) dehan, lei ida-ne’e laiha, tanba ne’e presiza akordu extradisaun hodi fasilita serbisu judisiál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here