iklan

NASIONÁL, DILI, HEADLINE

Posibilidade anin huu forte akompaña ho razada iha rejiaun kosteira

Posibilidade anin huu forte akompaña ho razada iha rejiaun kosteira

Previzaun tempu hosi DNMG Timor-Leste. Imajen/DNMG

DILI, 04 maiu 2021 (TATOLI)- Previzaun tempu hosi Diresaun Nasionál Meteorolojia Jeofízika (DNMG-sigla portugés), tersa loraik, hatudu iha posibilidade anin huu forte akompaña  ho razada  iha rejiaun kosteira (tasi-feto no tasi-mane).

Hosi observasaun ne’ebé maka ekipa DNMG halo bazeia ba modelu  meteorolójiku ne’ebé diferente hanesan modelu hosi BMKG (Bandan Metereologi Klimatologi dan Geofisika) no modelu rejionál BOM Australia (Bureau of Metereology) nian, nota katak, agora daudaun anin huu ho velosidade  moderadu bele mós lokalmente anin forte, akompaña ho rajada anin bele sustenta to’o 45 km/h (forte) prinsipalmente iha rejiaun kosteira (Tasi feto no Tasi mane).

“Diresaun anin predominante hosi Sudeste (Anin hosi Austrália). Iha sorin seluk observa mós katak kondisaun tasi agora daudaun iha  kosta sul (tasi mane) inklui Kosta Leste Lautem, laloran aas varia hosi 1.25 to’o 1.75 metru (moderadu) no previstu sei aumenta to’o  metru rua  durante  oras 36,’’ DNMG haktuir iha previzaun tempu ne’ebé publika liuhosi pájina ofisiál Facebook DNMG Timor-Leste.

Eventual ida-ne’e mosu tanba iha diferensa presaun entre rejiaun Austrália no Ázia.

Informasaun:

  • La iha tendénsia ba udan estremu, tanba ne’e husu ba komunidade iha territóriu nasionál prinsipalmente iha parte kosteira hosi Munisípiu Viqueque, Manatuto, Manufahi no Lautem no espesialmente ba maluk peskadór-sira atu nafatin tau atensaun ba eventu-sira, hadook-an hosi ai-hun boot, tasi-ibun, nune’e bele prevene hosi dezastre ne’ebé hotu-hotu la espera.
  • Husu mós  ba komunidade iha territóriu atu nafatin akompaña informasaun ba kondisaun tempu no klima hosi fonte ne’ebé konfiavel no kredivel liu-liu instituisaun ka autoridade ne’ebé serbisu iha ramu Redusaun Risku Dezastre.

Jornalista: Nelson de Sousa

Editór: Cipriano Colo

iklan
iklan

Leave a Reply

iklan
error: Content is protected !!