Imajen/Media PN.

DILI, 04 maiu 2021 (TATOLI)—Parlamentu Nasionál (PN) segunda horisehik aprova ona proposta-lei kona-ba orden ba advogadu sira iha faze jeneralidade.

Proposta-lei númeru 26/V/3ª, kona-ba orden ba advogadu sira aprova ho rezultadu votasaun a-favór 45 no abstensaun neen (6).

Substánsia hosi proposta-lei ne’e kona-ba regulasaun asesu no ezersísiu iha profisaun advogadu sira, inskrisaun no emisaun korrespondente sédula profisionál, ne’ebé asegura hosi Ministériu Justisa (MJ) liuhosi  Konsellu ba Jestaun no Disiplina iha Advokasia.

Proposta-lei ne’e komposta hosi artigu hamutuk ualu (8), anexu ida (1), kapítulu hamutuk sia (9), kontein ho artigu hamutuk 101.

Anexu ne’e komposta hosi kapítulu I kona-ba dispozisaun jerál ho artigu hamutuk 10, kapítulu II kona-ba órgaun Orden Advogadu Timor-Leste (OATL) iha sesaun I (dispozisaun jerál) ho artigu hamutuk 10, sesaun II (asembleia jerál) ho artigu neen (6), sesaun III (bastonáriu) ho artigu hamutuk rua (2), sesaun IV (diresaun) ho artigu hamutuk rua (2), sesaun V (konsellu jurizdisionál no fiskál) ho artigu hamutuk rua (2).

Kapítulu III kona-ba ezersísiu advokasia iha sesaun I (dispozisaun jerál) ho artigu hamutuk 15, sesaun II (inkompatibilidade no impedimentu sira) ho artigu hamutuk haat (4).

Entretantu kapítulu IV  kona-ba deontolojia iha sesaun I (prinsípiu jerál) ho artigu hamutuk neen (6), sesaun II (relasaun ho kliente) ho artigu hamutuk lima (5), sesaun III (relasaun ho tribunál) ho artigu hamutuk tolu (3), sesaun IV (relasaun entre advogadu sira) ho artigu hamutuk tolu (3).

Hosi parte kapítulu V kona-ba disiplina iha artigu hamutuk 10, kapítulu VI kona-ba rejime patrimoniál ho artigu rua (2), kapítulu VII kona-ba kooperasaun institusionál iha artigu ida de’it.

Nune’e mós kapítulu VIII kona-ba adgovadu no advogadu estajiáriu iha sesaun I (inskrisaun OATL) iha artigu hamutuk haat (4), sesaun II (inskrisaun atu sai advogadu) iha artigu hamutuk haat (4), sesaun III (estájiiu no inskrisaun atu sai advogadu estajiáriu) iha artigu hamutuk hitu (7).

Kapítulu IX kona-ba dispozisaun finál iha sesaun I (responsabilidade kriminál no sivíl) iha artigu hamutuk tolu (3) no sesaun II (dispozisaun sira seluk) iha artigu hamutuk rua (2).

Hafoin aprovasaun iha jeneralidade ba proposta-lei, meza prezidénsia anunsia no entrega hikas ba Komisaun A ne’ebé trata asuntu Justisa no Konsttitusionál atu kontinua halo diskusaun no aprovasaun iha espesialidade, hafoin sei agenda hodi halo aprovasaun finál globál iha plenária.

Prezidente Komisaun A, Deputadu Joaquim dos Santos ‘Boraluli’ fó-sai antes ne’e katak proposta-lei ne’e atu regula ezisténsia advogadu sira iha Timor-Leste.

“Kuandu orden adgvogadu ne’e sai (vigora) entaun orden barak bele mosu, hanesan orden ba médiku sira no orden seluk tán bele mosu,” nia esplika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here