Ministra Saúde, Odete Maria Freitas Belo. Imajen TATOLI /Egas Cristóvão

DILI, 04 maiu 2021 (TATOLI)Ministériu Saúde (MS) daudaun ne’e prepara hela fatin hodi muda pasiente ne’ebé antes ne’e pozitivu COVID-19 iha sala izolamentu Vera Cruz, ba Hospital Nasional Guido Valadares (HNGV), maibé ba hirak ne’ebé ho teste negativu ona.

Ministra Saúde, Odete Maria Freitas Belo, klarifika, razaun MS muda pasiente ba ospitál nasionál tanba livre ona hosi COVID-19 maibé nafatin iha moras seluk no dependénsia nafatin ba oxijéniu.

“Loos duni, HNGV prepara hela fatin ba pasiente COVID-19 sira ne’ebé halo tratamentu sala izolamentu Vera Cruz, maibé daudaun ne’e sira-nia teste Polymerase Chain Reaction (PCR) negativu ona, maibé nafatin iha moras hanesan paru-paru no dependente hela ba oxijéniu, tanba ne’e maka ami deside muda ba ospitál nasionál,” Ministra Odete hateten, hafoin ramata reuniaun ho Primeiru-Ministru (PM), Taur Matan Ruak iha Rezidénsia Farol, tersa ne’e.

Governante ne’e garante katak pasiente sira ne’ebé muda ba HNGV sei la afeta ba pasiente sira ne’ebé baixa hela no ema akompaña pasiente.

“Muda sira ba HNGV la fó impaktu ba pasiente seluk tanba virus laiha ona, nune’e profisionál saúde sira halo tratamentu ba sira hanesan bain-bain,” nia akresenta.

Ministra haktuir, daudaun iha pasiente ida mak sei uza hela ventilatór, maski teste PCR hatudu rezultadu negativu.

“Nia iha problema pulmaun maka seidauk bele husik oxijéniu, tanba ne’e mak sei uza hela ventiladór no muda halo tratamentu bain-bain iha HNGV,” nia hatutan.

Antes ne’e, iha domingu (02/05), Sala Situasaun-Sentru aintegradu Jestaun Krize (SS-CIGC, sigla portugés) informa katak iha kazu detetadu COVID-19 ida, ne’ebé baixa iha Vera Cruz iha loron 12 abríl 2021, ho Sindroma Insufisiénsia Respiratória Aguda (SIRA).

Nune’e, hahú kedas uza ventiladór iha loron nia tama Vera Cruz, maibé iha 02 maiu transfere ona ba Unidade Kuidadu Intensivu HNGV, ne’ebé bazeia ba teste PCR hatudu negativu dala-tolu iha loron 23, 24 no 25 abríl, maibé sei nafatin uza ventiladór liuhosi trakeostomia.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here