Administradór Munisipiu Liquiça hanesan mós prezidente ba grupu traballu jéneru, Domingos da Conceição dos Santos. Imajen Tatoli/dok

LIQUIÇA, 04 maiu 2021 (TATOLI) – Administradór Munisipiu Liquiça hanesan mós prezidente ba grupu traballu jéneru, Domingos da Conceição dos Santos hateten, partisipasaun feto iha servisu hotu iha Liquiça foin atinje 20%.

“Agora feto nia partisipasaun iha servisu privadu, públiku no iha emprezáriu sira númeru la boot ha’u bele dehan 15-20% iha munisipiu ne’e, ita haree durante ne’e mane mak barak liu asume kargu xefia sira,” Domingos da Conceição dos Santos ba Agéncia Tatoli iha Liquiça, tersa ne’e.

Nia esplika, daudaun ne’e feto ne’ebé asume kargu xefia iha administrasaun públika-sira mak hanesan, sentru Saúde Munisípiu lidera hosi feto, Ministériu Solidariedade Sosiál no Inkluzaun (MSSI) diretora lidera hosi feto, Komandu Polísia Nasional Timor-Leste (PNTL) lidera mós hosi feto, maibé kompara mane mak sei barak liu.

“Feto nia partisipasaun sei menus, maibé komesa hahú ona ita haree iha instituisaun saúde feto ida mak lidera, Polísia mós hanesan, iha vida emprezariál sira maioria feto mak diretora, maske sei menus, maibé partisipasaun feto nian kontinua aumenta beibeik,” Domingos da Conceição dos Santos hateten.

Nia relata, hanesan Prezidente hodi lidera ekipa ne’e sente númeru  partisipasaun feto nian iha servisu sira seidauk másimu.

“Atu halo too númeru feto sira nian hodi partisipa iha servisu no atividade hotu presiza korajen feto sira nian para atu halo servisu hatudu sira nia kapasidade pratika iha servisu administrasaun sira, pratika servisu privadu sira hanesan kompañia, empreza ki’ik sira. Servisu agora ne’e la’ós hatudu de’it feto sira mai servisu iha administrasaun públiku mak hatudu factor determinante maibé servisu iha privadu sira mós sira iha papél importante atu kontribui,” nia subliña.

Bainhira feto-sira hatudu servisu no kapasidade iha sosiedade bele kontribui ona hodi hasae númeru partisipasaun feto nian iha servisu ba dezenvolvimentu ida ne’e.

Nia husu ba feto Liquiça oan hotu atu labele lakon vontade, tenke iha nafatin vontade atu partisipa iha atividade saida de’it hodi kontribui ba prosesu dezenvolvimentu agora la’o hela.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here