Ambiente fa’an sasán iha Merkadu Same, Manufahi. Imajen Tatoli/Nelia Fernandes

DILI, 04 maiu 2021 (TATOLI)-Administradór Munisípiu Manufahi, Arantes Isaac Sarmento, informa sira-nia parte submete ona dadus vítima dezastre naturál ba Ministériu Administrasaun Estatál (MAE).

Notísia Relevante : OJE 2021, Munisípiu Manufahi foin atinje ezekusaun 27.6%

Administradór Munisípiu Manufahi, Arantes Isaac Sarmento. Imajen Tatoli/Dok

“Kona-ba vítima dezastre naturál, Munisípiu Manufahi la akontese hanesan mota sobu uma ka lori uma, maibé akontesimentu dezastre naturál ne’ebé akontese iha loron 04 abríl liubá ne’e, anin sobu komunidade nia uma, bee tama uma no rai monu taka komunidade nia uma hamutuk 73,” Arantes Isaac Sarmento informa ba Agência Tatoli liuhosi telefónika, tersa ne’e.

Hosi uma-73 ne’e, Arantes Isaac Sarmento hateten uma sira-ne’e konsidera estraga kmaan de’it, tanba anin mak sobu no bee mak tama de’it uma, ne’ebé apoiu emerjénsia vítima sira hetan hotu ona.

“Bainhira akontese dezastre naturál, ami fó kedas  apoiu emerjénsia hanesan ai-han no la’ós ai-han ba sira no daudaun ne’e vítima sira-nia kondisaun di’ak hotu no kontinua hela iha sira-nia uma, tanba uma hetan estragu kmaan de’it,” nia haktuir.

Manufahi nia infraestrutura públiku ne’ebé hetan estragu mak hanesan, estrada iha Postu Administrativu Fatuberliu, Suku Fahinihan no Bubusus mak hetan estragu ho mós estrada no Ponte Postu Administrativu Turiscai  mak hetan estragu.

“Preokupasaun sira-ne’e ami relata hotu ona ba nasionál, liu-liu ba Institutu Jestaun Ekipamentu, Empreza Públiku (IGE-EP) nune’e bele tau atensaun lalais ba preokupasaun sira ne’e,” Arantes Isaac Sarmento tenik.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here