Logotipu La'o Hamutuk. Imajen/Espesiál

DILI, 04 maiu 2021 (TATOLI)-Organizasaun Naun Governamentál (NGO) La’o Hamutuk husu ba Governu fó apoiu subsídiu estraordináriu la bele sakrifiika prinsípiu igualdade no justisa sosiál nian no la bele diskrimina kontra povu ki’ik sira, tanba sira konsidera katak Governu fó subsídiu estraordináriu la tuir prinsípiu justisa sosiál no igualdade.

Peskizadór La’o Hamutuk, Celestino Gusmão Pereira hateten, tuir planu ba subsídiu estraordináriu ida-ne’e, montante subsídiu sei kalkula bazeia ba ema-nia saláriu ka rendimentu baibain, katak polítika ida ne’e bele hametin dezigualdade iha rai-laran, liuhosi fó apoiu boot liubá sira ne’ebé hetan saláriu boot, kompara ho ema ki’ik ka sira ne’ebé simu saláriu mínimu.

“Objetivu hosi apoiu sosiál mak atu ajuda povu sustenta moris, la’ós atu hametin dezigualdade. Nu’udár alternativu, La’o Hamutuk fó sujestaun atu kalkula montante subsídiu estraordináriu bazeia ba númeru membru uma-kain, laho referénsia ba ema-nia saláriu ka rejistrasaun ho seguransa sosiál, nune’e husu Governu atu inklui sira ne’ebé hela iha fatin aluga (kost) ka fatin ne’ebé independente hosi família, hodi bele asesu mós ba subsídiu estraordináriu,” Peskizadór La’o Hamutuk, Celestino Gusmão Pereira hateten liuhosi komunikadu imprensa ne’ebé Agência Tatoli asesu, tersa ne’e.

Celestino Gusmão Pereira hateten, iha tempu susar hanesan agora, Governu presiza foti medida no desizaun ne’ebé di’ak hodi garante bem estár povu hotu.

Nia hatutan ho preokupasaun sira-ne’e, horiseik, ONG La’o Hamutuk entrega karta nakloke ba Prezidente Repúblika atu hatudu preokupasaun ho maneira implementasaun apoiu sosiál ne’ebé la tuir prinsípiu igualdade no justisa, bazeia ba alterasaun Lei 14/2020 kona-ba Orsamentu Jerál Estadu 2021 ne’ebé Prezidente Repúblika foin promulga iha loron 03 maiu.

Nia dehan, Governu planu atu fahe subsídiu estraordináriu bazeia ba dadus sistema Seguransa Sosiál nian ho rezultadu katak sidadaun hotu-hotu sei la hetan apoiu ne’ebé hanesan. Molok Parlamentu no Prezidente aseita ba polítika refere, La’o Hamutuk entrega submisaun ba Membru Parlamentu Nasionál no husu atu la uza sistema seguransa sosiál nu’udár baze ba apoiu sosiál.

“Submisaun ida ne’e esplika katak la justu atu hametin dezigualdade liu hosi fó apoiu boot liu ba sira ne’ebé hetan ona osan kompara ho ema ki’ik no kiak sira ne’ebé seidauk partisipa iha ekonomia formál. Maske Alterasaun ba Lei 14/2020 fó oportunidade ba sira ne’ebé seidauk tama iha sistema seguransa sosiál atu halo rejistu, ne’e sei enkoraja ema atu la kumpre ho regra konfinamentu, ne’ebé fó risku ba ita-nia komunidade, no fó todan ba povu,” nia dehan.

Nia haktuir, karta ne’ebé La’o Hamutuk entrega ba Prezidente Repúblika iha loron 03 maiu, dehan sistema apoiu sosiál la bele forsa ema atu hili ida hosi sira-nia saúde no sira-nia direitu atu simu apoiu, no la bele enkoraja ema atu la kumpre ho regra konfinamentu.

“Tanba ne’e bainhira hasoru situasaun sosioekonómiku ne’ebé grave no urjente, Governu la bele sakrifika prinsípiu igualdade no justisa sosiál,” nia afirma tan.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here