Diretór Departamentu Komunikasaun Sosiál Universidade Nacional Timor Lorosa’e (UNTL), Marcelino Magno. Imajen/Espesiál.

DILI, 04 maiu 2021 (TATOLI)—Diretór Departamentu Komunikasaun Sosiál Universidade Nasionál Timor Lorosa’e (UNTL), Marcelino Magno, hateten maske Konsellu Imprensa (CI, sigla português) relata nia rezultadu analize hateten kualidade jornalista Timor-oan monu makaas maibé presiza instituisaun seluk halo peskiza kona-ba kualidade jornalizmu iha Timor-Leste, nune’e bele kompleta malu no halo di’ak liután kualidade iha futuru.

Notísia Relevante: CI sukat jornalista nia kualidade monu ho sasukat faktu-dadus-fonte

Marcelino Magno hatutan, presiza hatene kualidade monu ne’e iha aspetu saida no presiza haree didi’ak tanba nia parte seidauk hatene CI uza métodu saida mak hodi halo analize tanba iha métodu oioin hanesan iha Komunikasaun Sosiál ne’e uza analiza konteúdu.

“Ita tenta haree peskiza ne’e tanba iha buat balun ne’e mak sira foti iha ne’ebá. Maibé hanesan akadémiku ida katak ida-ne’e la’ós peskiza ne’ebé loos de’it ona. Atu dehan loos ka la loos presiza halo peskiza ida tan para hatene rezultadu ne’e loos ka lae. Se CI halo perkiza bazeia ba buat ruma mak ema seluk mós tenke halo peskiza ruma para hatene loos ka lae,” Diretór Departamentu Komunikasaun Sosiál ne’e hateten ba Ajénsia TATOLI, via telefónika, segunda ne’e.

Tuir nia rezultadu analiza ne’e sai hanesan referénsia ida ba estudante no profesór sira iha Departamentu komunikasaun sosiál, atu bele halo peskiza ka halo analiza iha futuru.

“Ami sei husu ajuda ba CI atu fó referénsia ba ami, nune’e hatene peskiza ne’e loos maibé ita-nia jornalista nia kualidade monu ne’e ida-ne’ebé no aat ne’e iha parte ne’ebé, no atu hadi’a ne’e oinsá no uza aspetu saida,” nia dehan.

Kualidade jornalista monu makaas ne’e, nia ladún konkorda, tanba presiza halo analiza kle’an. Nia hatutan bainhira iha erru ruma tenke aprezenta para ema hotu halo analiza no foti konkluzaun ba asuntu ne’e maibé halo analiza liuhosi rona no observa de’it ne’e labele.

Maske nune’e, nu’udar akadémiku nia sente orgullu ho jornalista sira tanba iha tinan ida-ne’e liberdade imprensa iha Timor-Leste di’ak tebes iha ASEAN tanba Timor-Leste okupa númeru primeiru. Ida ida-ne’e sai hanesan indikadór ida katak mídia no jornalista Timor-Leste goza duni liberdade imprensa.

Maibé, nia dehan, ho indikasaun ida-ne’e la’ós atu halo kontente maibé tenke servisu makaas liután tanba liberdade imprensa ne’e la gratuita maibé ema servisu makaas mak foin hetan.

“Se ita to’o iha funsaun no indika katak mídia ho jornalista iha Timor-Leste ne’e hala’o sira-nia knaar ho di’ak no komunidade mós la impede liberdade imprensa. Tanba ne’e mak ha’u hakarak kongratula ba komunidade mídia iha Timor-Leste, no observasaun jerál katak ita goza duni liberdade imprensa ne’e,” nia dehan.

Kombate Hoax

Iha Timor-Leste, Marcelino Magno hateten, iha duni espasu ba liberdade imprensa maibé problema mak iha tinan kotuk ho propagasaun ne’e mosu ho fatór barak ne’ebé impede movimentu jornalista sira-nian, entaun jornalista sira tenke esforsu makaas atu kombate informasaun hoax sira-ne’ebé públika iha mídia sosiál sira.

“Jornalista sira tenke esforsu makaas atu kombate hoax, tanba informasaun hoax ne’ebé fó sai iha mídia sosiál. Ita-nia mídia konvensionál no mídia profísional sira mós kompete tanba lakon espasu ida ka natoon, tanba kada ema ka grupu lori sira-nia maneira rasik hodi prodús informasaun hoax sira. Entaun ida-ne’e sai impaktu boot no kria konfuzaun ba públiku,” nia hateten.

Tanba, tuir akadémiku ne’e, mídia konvesionál laduun lais ho mídia sosiál ne’ebé mak prodús hoax iha sosiedade nia leet, tanba ema ne’ebé kria hoax ne’e la’ós ema baibain maibé dala ruma hosi parte akadémiku no polítika sira balun inklui governante no populasaun baibain sira.

Maske mosu informasaun hoax ua’in hosi mídia sosiál sira-ne’ebé kompete ho mídia profesionál sira, maibé nia parte kontinua apresia ho servisu jornalista sira-nian iha terrenu.

“Ha’u nu’udar dosente komunikasaun sosiál nian, ha’u apresia tebes ho servisu jornalista sira-nian. Mezmu sira atraza no tenta buka isu ne’ebé sira halo konfirmasaun no verifikasaun ne’ebé ita-nia mídia enjerál rejustifika fali informasaun ne’ebé loos,” Eis jornalista ne’e dehan.

Tuir nia pontu de vista, knaar jornalista sira-nian sei nafatin iha responsabilidade no kontrovesiál tebes ka la sees dook hosi kódigu étika jornalístika nian maibé problema mak jornalista sira tenke kompete ho hoax sira-ne’e, tanba informasaun hoax ne’e lais liu.

Nune’e, nia dehan, jornalista sira tenke verifika no konfirma tanba jornalista profísional bele lakon espasu ida ho informasaun hoax ne’e, entaun jornalista tenke buka fonte nune’e bele fó informasaun ne’ebé mak kredivél.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here