Grupu BibiAin-AtenBrani. Imajen/BibiAin-AtenBrani

DILI, 04 maiu 2021 (TATOLI)Grupu BibiAin-AtenBrani, ne’ebé kompostu husi joven na’in-sia, ho inisiativa rasik la’o “door to door” iha Irlanda Norte hodi buka no rekolla fundu hamutuk $5.000 inklui roupa no brinkedu ba labarik sira hodi apoiu Timor-Leste.

Fundu, materiál, brinkedu ba labarik sira ne’e, hodi fó apoiu komunidade afetadu dezastre naturál ne’ebé akontese iha 04 abríl liubá.

Materiál ne’ebé grupu konsege rekolla. Imajen/BibiAin-AtenBrani

“Hosi osan ho $5.000 ne’ebé konsege rekolla, $4.000 envia ona ba Grupu Movimentu Solidariedade Fó Liman Ba Malu hodi hala’o servisu iha baze, ne’ebé dirijidu hosi Nelson Turquel,” refere komunikadu Grupu BibiAin-AtenBrani ne’ebé Agência TATOLI asesu, tersa ne’e.

Tuir komunikadu, osan $1.000 sei ajuda selu kustu kontentór ida hodi manda sasán ne’ebé BibiAin-AtenBrani rekolla atu manda mai iha finál maiu no sei simu hosi Movimentu Solidariedade Fó Liman Ba Malu hodi distribui ba komunidade sira iha área remota.

Materiál ne’ebé grupu konsege rekolla. Imajen/BibiAin-AtenBrani

Relasiona ho materiál sira, daudaun grupu BibiAin-AtenBrani rekolla ona roupa, sapatu, kazaku, pasta ba bebé, labarik no ema-boot, brinkedu, kariña ba bebé inklui produtu ijiéniku no materiál eskolár nian.

“Doadór sira la’ós de’it hosi timor-oan, maibé mós komunidade irlandés, portugés, polaku, lituanu no seluktan,” Grupu BibiAin-AtenBrani haktuir iha komunikadu ne’e.

Kona-ba prosesu enviu, hetan apoiu lojístiku hosi kompania kontentór ka Container Dungannon no MSG Container, ne’ebé na’in ba kompañia rua ne’e timor-oan hotu.

Atividade door to door rekolla fundu no sasán. Imajen/BibiAin-AtenBrani

Prosesu sei demora fulan rua tanba sei hakat hosi tasi ida ba tasi ida, ne’ebé sei to’o iha jullu, maski apoiu refere to’o kle’ur, maibe tuir nota ne’e katak timor-oan hotu iha Irlanda Norte serbisu maka’as nafatin hodi tulun ba Timor-Leste.

Aleinde ne’e, apoiu no asaun karidade ne’e, Grupu BibiAin-AtenBrani mós organiza misa iha loron 30 abríl 2021 ho komunidade timor-oan sira igreja Saint Patrick Dungannon hodi hanoin hikas ba vítima mortál dezastre naturál ne’ebé akontese foin lalais.

Entretantu, grupu ne’e harii foin lalais ne’e, hadoin simu telefone hosi família sira iha Timór kona-ba dezastre naturál.

Fundu ba vítima dezastre naturál. Imajen/BibiAin-AtenBrani

Tuirmai, sira hahú atividade la’o “door to door” ka hosi uma ba uma iha sidade Dungannon, ne’ebé timor-oan hela ba, hodi esplika sira-nia misaun no iha loron ne’e kedas hetan apoiu másimu hosi komunidade timor-oan hotu iha Irlanda Norte.

Ho inisiativa ne’e, insentiva mós timor-oan hotu iha sidade seluk no Inglaterra hodi hamutuk ajuda Timór.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here