Ministru Justisa, Manuel Cárceres da Costa. Imajen Tatoli/Egas Cristovão.

DILI, 04 maiu 2021 (TATOLI)—Governu liu hosi Ministériu Justisa (MJ), ho Ministériu Negósiu Estranjeiru no Kooperasaun (MNEK), sei hasai diploma ministeriál konjuntu, hodi atende Timoran iha diaspora ne’ebé passaporte inválidu.

Ministru Justisa, Manuel Cárceres da Costa ho Ministra MNEK, Adaljiza Magno, diskute ona mekanizmu produsaun diploma ministeriál ne’e.

Notísia relevante:Governu sei atende Timoroan iha diaspora ne’ebé pasaporte inválidu

“Iha diskusaun, hetan ona akordu ida katak, ministériu rua sei halo diploma ministeriál ida atu atende Timoroan ne’ebé passaporte besik inválidu no inválidu ona no oras ne’e daudaun iha hela nasaun seluk,’’ Manuel Cárceres, hateten ba jornalista Agéncia Tatoli, iha edifísiu MNEK, Praia dos Coqueiros, Dili, tersa ne’e.

Nia dehan, Parte MNEK mós  sei haruka kedan karta ida hanesan nota diplomátika ba nasaun hotu-hotu, liu hosi embaxada-sira, hodi trata asuntu ne’e ho lalais.

Governante ne’e hatutan, nota no meiu diplomasia ne’ebé MNEK haruka, atu bele husu ba Estadu-sira ne’ebé Timoroan-sira hela bá, katak, bainhira Timoroan ne’ebé passaporte no vistu inválidu, presija rekoñese nafatin no labele foti sansaun.

“Hanesan mós iha Timor-Leste,  ita halo ba sidadaun estranjeiru-sira ne’ebé hela iha ne’e, tanba ho situasaun COVID-19,’’ nia subliña.

Liu hosi diploma ne’e, nia fiar katak, sei fó dalan ba embaixada TL iha nasaun-sira ne’ebé Timoroan iha bá, atu emite dokumentu ho naran viajen únika ba sidadaun ne’ebé passaporte inválidu,  iha posibilidade atu fila-mai TL, bele fasilita nune’e labele hetan impedimentu ruma iha fatin tránzitu voo.

Antes ne’e, Serbisu Rejistu Notariadu simu pedidu hosi Timoroan 1000-resin ne’ebé hala’o estudu no serbisu iha Portugál, Cavo Verde, Koreia Súl, Irlanda Norte, Inglaterra, Filipina no Tailándia ne’ebé passaporte inválidu no labele fila-mai TL.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here