Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 04 maiu 2021 (TATOLI)--Governu liuhosi ministériu implementadór programa Cesta Bázika, autoriza kompañia hodi nafatin distribui sasán ba sidadaun ne’ebé seidauk simu iha munisípiu impoin Serka Sanitária no Konfinamentu Domisiliáriu Jerál, maibé kontinua kumpre medida prevensaun COVID-19.

Desizaun ne’e ho baze despaisu konjunta ministériu implementadór 02/MCAE/MTCI/MAP/III/2021 ba extensaun prazu distribuisaun Cesta Bázika to’o loron 31 maiu 2021.

Rezolusaun Governu númeru 45/2021 29 abríl ne’ebé impoin filafali Konfinamentu Domisiliáriu Jerál ba populasaun iha munisípiu Dili no Serka Sanitária iha munisípiu Ainaro, Baucau, Dili, Ermera, Covalima, Viqueque, Lautém, Liquiçá no Manufahi.

“Tuir Dekretu-Lei 24/2021 28 abríl, alinea 11, fó esesaun no autoriza implementasaun programa Cesta Bázika. Tanba ne’e, Ministériu Turizmu, Komérsiu no Indústria (MTKI) hanesan ajente prinsipál ba implementasaun programa, ho esforsu tomak sei kontinua iha munisípiu Dili, Ermera, no sidade munisípiu Lautém, Bobonaro, Ainaro, Viqueque, Baucau, no Manufahi, ho totál populasaun kuaze 200.000,” refere nota ne’ebé Agência TATOLI asesu, tersa ne’e.

Notísia relevante: MF finaliza ona pagamentu 94 ho montante millaun $25

Aleinde ne’e, razaun kontinua distribui Cesta Bázika atu apoia nesesidade bázika no esensiál hanesan foos, modo, mina no seluk tan ba komunidade, hanesan medida planu rekuperasaun ekonómika no parte ida hosi apoiu umanitáriu hosi VIII Governu Konstitusionál liuhosi koordenasaun ho emprezáriu responsável durante períodu Serka Sanitária no Konfinamentu Domisiliáriu.

Nune’e, atividade distribuisaun sei hala’o simultaneamente no tuir oráriu ne’ebé hatuur ona iha munisípiu Dili, iha suku Becora, Bairo Pité, Comoro, Madohi, Santa Cruz, Mascarenhas, no suko Motael.

Iha munisípiu Ermera sei fahe iha postu administrativu sira hanesan Hatulia, Letefoho, Atsabe inklui posto administrativu Ermera.

Nune’e mós, iha munisípiu Lautém iha suku Fuiloro, iha munisípiu Bobonaro iha suku Lahomea no suku Aidaba-leten, iha munisípiu Ainaro iha suku Ainaro Vila no Manutaci.

Enkuantu,  iha munisípiu Viqueque iha suco Caraubalo, Bibileo, no suko Uma Ain-Leten no  iha munisípiu Baucau iha suku Triloca no suku Trilolo-aldeia Betulale no Lutumuto inklui iha munisípiu Manufahi iha suku Holarua no suku Letefoho.

MTKI mós halo ona koordenasaun ho Sala Situasaun-Sentru Integradu Jestaun Krize (SS-CIGC, sigla portugés), atu komunidade sira mantein disiplina no halo tuir protokolu Organizasaun Mundiál Sáude (OMS) no Ministériu Saúde (MS).

Funsionáriu MTKI no ekipa hotu ne’ebé sei envolve iha distribuisaun Cesta Bázika, obrigatoriumente halo teste swab no rezultadu negativu maka sei destaka halo atividade distribuisaun.

Durante tividade, MTCI sei halo koordenasaun másimu ho autoridade lokál sira no mós Polísia hodi mantein no halo tuir medida preventiva COVID-19 hanesan distansiamentu fíziku, uza máskara, no fase liman antes tama ba iha fatin distribuisaun no halo tuir prosedimentu internu ministériu implementadór ba programa Cesta Básika, ne’ebé hatuur ona atu distribui tuir oráriu.

Atividade ne’e mós haree ba Rezolusaun Governu númeru 28/2020 19 agostu, ne’ebé aprova kona-ba medida kurtu prazu ba mitigasaun impaktu krize ekonomia rezulta hosi pandemia COVID-19 iha ámbitu Planu Rekupersaun Ekonómika.

Iha artigu 115 Konstituisaun Repúblika, inkumbe ba Governu atu prátika aktu no toma providensiál nesesária ba dezenvolvimentu ekonómiku-sosial no satisfasaun ba timor-oan hotu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here