Logotipu MEJD

DILI, 04 maiu 2021 (TATOLI) – Dirasaun Nasionál Asaun Sosiál Eskolár (DNASE) hetan alokasaun Orsamentu Jerál Estadu 2021 purvolta $204,096 atu realiza programa haat ne’ebé planeia ona, maibé to’o agora DNASE seidauk ezekuta OJE ne’e.

Diretór Nasionál Asaun Sosiál Eskolár (DNASE), Joaquim Martins, esplika ho orsamentu ne’ebé iha loloos ne’e sira realiza ona planu no programa haat mak hanesan monitorizasaun no avaliasaun ba programa merenda eskolár, asaun sosiál eskolár, desportu eskolár mo mós prepara material emerjénsia.

Hosi programa sira-ne’e mak fahe ba viajen lokál, despeza no operasionál inklui formasaun profisionál ka semináriu. Maibé, to’o agora programa sira-ne’e labele realiza tanba seidauk hetan alokasaun orsamentu hosi aprovizionamentu.

“ami aprezenta ona proposta orsamentu primeiru semestrál nian ba aprovizionamentu atu ezekuta ami nia programa kada item. Maibé, ami seidauk hetan alokasaun orsamentu hodi halo kompras, ami seidauk hetan alokasaun to’o agora. Tan ne’e ami laiha movimentu no ami mós seidauk iha persentajen ba ezekusaun,” Joaquim Martins,  informa ba jornalista-sira iha ninia servisu fatin Ministériu Edukasaun, Juventude no Desportu (MEJD), Vila Verde, Dili, tersa ne’e.

Nia afirma katak proposta hotu loos ona, maibé aprovizionamentu maka to’o agora sei halo hela avaliasaun ba proposta DNASE nian, tan ne’e mak iha orsamentu ezekusaun primeiru semestrál ne’e labele ezekuta. Maibé, Joaquim Martins garante katak, ba segundu semestrál ne’e ninia parte sei halo ezersísiu maka’as atu bele ezekuta dala ida, hodi nune’e, bele atinje 50%.

Joaquim Martins espera katak estadu emerjénsia ho medida konfinamentu obrigatóriu iha Dili ne’e bele termina atu posibilidade DNASE bele aselera ninia programa-sira molok tinan ne’e remata bele atinje 100% ezekusaun OJE 2021 nian.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here