iklan

NASIONÁL, COVID-19, DILI, HEADLINE, LEI, SAÚDE, SEGURANSA

Dezobediénsia, PNTL teste swab masal ba populasaun iha Dili

Dezobediénsia, PNTL teste swab masal ba populasaun iha Dili

Dezintendimentu entre membru PNTL ho populasaun iha Sentru Formasaun Polísia (CFP sígla portugés), Comoro, bainhira halo teste swab masal tanba kontra regra serka sanitária, tersa (04/04/21). Imajen Tatoli/António Gonçalves.

DILI, 04 maiu 2021 (TATOLI)—Polísia Nasionál Timor-Leste (PNTL) liu hosi Seksaun Médiku, koopera ho Ekipa Pilar III, Ministériu Saúde (MS), hodi halo teste swab masal COVID-19, ba abitante-sira ne’ebé dezobediénsia ba regra Serka Sanitária iha kapitál Dili.

Desizaun ne’e Komandu Jerál PNTL ho MS halo ho intensaun atu halo identifikasaun sedu ba kondisaun saúde abitante-sira, nu’udár meiu hodi prevene an hosi peste letál ne’e no husu atu komunidade hela dei’t iha uma.

Notísia relevante:PNTL sei tama-sai bairru no kriminaliza dezobediénsia ba regra

Iha prosesu pasa revista, obrigatoriamente abitante-sira tuir teste swab masal, ne’ebé hala’o iha arredór Sentru Formasaun Polísia (CFP sígla portugés) Comoro, hamosu dezentendimentu entre komunidade 100-resin ho polísia, tanba la simu desizaun ne’e.

Abitante Alberto ‘Unimoc Nahareka’ lamenta tanba polísia haruka abitante-sira tama tiha áredór Akademia PNTL, maibé haruka ema balun fila no balun de’it mak tuir teste swab obrigatóriu.

“Regra saida mak ne’e. Haruka ami balun tama tiha tuir teste, balun haruka fila-fali, ne’e la justu,” Unimoc Nahareka protesta.

Abitante ne’e dudu-malu ho polísia tanba hakarak atu loke portaun CFP, maibé la konsege, tanba PNTL blokeia totál.

Iha fatin hanesan, abitante Suku Comoro, Daniel Vicente da Costa, konsidera asaun polísia obriga abitante-sira, ne’e ladún di’ak, tanba halibur ema-sira iha fatin ne’ebé la seguru bele hamosu cluster foun.

“Ami la simu atu halo teste hanesan ne’e, tanba tuir loloos Governu hakarak halo teste swab, koordena ho ami-nia xefe suku ida-idak foin bele halo teste iha suku no aldeia, la’ós mai obriga ami forma butuk fali iha-ne’e,” Daniel mós kestiona.

Dezentendimentu no haksesuk-malu  kuaze oras ida-resin, ikus-mai Portavóz Komandu Jerál PNTL, Superintendente Xefe, Arnaldo de Araújo ho Segundu Komandante Akademia PNTL Comoro, Superintendente, Boavida Ribeiro, konsege hakalma hodi esplika regra implementa Serka Sanitária ne’ebé implementa iha Dili.

“Ami husu atu imi hotu tenki kumpre no intendente didi’ak saida mak hanaran konfinamentu domisiliáriu. Husu atu ita hotu tuur hakmatek nune’e evita moras ne’e labele da’et. Saida mak ami halo, tanba atu kumpre órden Estadu,” Boavida Ribeiro esplika hodi hakalma situasaun.

Portavóz PNTL, Superintendente Xefe, Arnaldo de Araújo dehan, bainhira halo teste swab ba komunidade mak pozitivu COVID-19, ekipa Ambulánsia PNTL ho Ministériu Saúde tenki lori kedan ba sentru izolamentu atu bele hala’o tratamentu saúde.

“Teste swab ne’e obrigatóriu ba komunidade, balun koopera di’ak, balun la koopera to’o mosu dezentendimentu. Bainhira teste mak rezultadu pozitivu, tenki tama izolamentu,” Arnaldo de Araújo dehan.

PNTL sei kontinua halo operasaun iha kapitál Dili, atu buka-tuir komunidade ne’ebé la kumpre regra, tenke tuir teste swab hodi koopera ho desizaun Estadu.

Hafoin hetan tiha esplikasaun, ekipa médika PNTL hamutuk ho ekipa hosi MS Pilar III kontinua halo teste swab ba abitante 100-resin.

Notísia relevante:PNTL hahú operasaun rigorozu iha Dili

Jornalista: Eugénio Pereira

Editór: Cipriano Colo

iklan
iklan

Leave a Reply

iklan
error: Content is protected !!