Ministru Edukasaun Juventude no Desportu, Armindo Maia. Imajen/Antonio Goncalves

DILI, 04 maiu 2021 (TATOLI) – Ministru Edukasaun Juventude no Desportu (MEJD), Armindo Maia ho Director KOICA iha Timor, Eunju CHA, selebra ona memorandum entendimentu atu aselera prosesu reabilitasaun sentru futeból juveníl no kampu futeból komunitária tolu iha tinan oin ho orsamentu millaun $6.5.

Ministru Edukasaun Juventude no Desportu (MEJD) Armindo  Maia, esplika sentru ida ho kampu futeból tolu ne’ebé Governu Korea sei hadi’a iha 2022 ne’e mak sentru futeból juveníl sei harii iha Becora, no kampu futeból komunitária tolu ne’e sei harii iha Bidau, Kampu Bintang, Aitarak Laran iha Kampung Alor no Comoro iha kampu Malinamok.

“Orsamentu millaun $6.5 ne’e apoiu hosi Governu Korea liuhosi KOICA no prosesu reabilitasaun ne’e sei realiza iha tinan oin. Ne’ebé ohin ita selebra ona asinatura nota entendimentu ne’e atu fó espasu ba KOICA hodi bele prepara ona ninia prosesu baihira desizaun estadu emerjénsia termina bele hala’o ona reabilitasaun ne’e,” Ministru Armindo Maia informa ba jornalista-sira iha salaun enkontru MEJD, Vila Verde, Dili, tersa ne’e.

Ministru Armindo afirma katak alende reabilitasaun sentru no kampu tolu, KOICA mós sei fornese ekipamentu desportu ne’ebé nesesáriu ba fasilidade sira ne’ebé maka MEJD ho embaixadór Korea asina ona.

Nune’e mós Korea sei apoiu fornese peritu sira atu fó formasaun ba treinadór juveníl-sira inklui atu ajuda SEJD hodi elabora manual ba lingua futeból juveníl hosi idade 11 to’o 16.

Embaixadór Korea mai TL, Kim Jeong Ho ne’ebé asiste selebrasaun akordu ne’e hateten, projetu reabilitasaun ne’e loloos realiza ona iha tinan ida ne’e,  maibé tanba problema global ne’ebé akontese iha mundu inklui TL entaun buat hotu labele realiza.

Kompromisu Korea nian ba tinan oin 2022, inísiu janeiru projetu reabilitasaun sentru futeból juveníl no kampu futeból komunitária tolu ne’e tenke realiza ona. Ho durasaun tempu tinan tolu.

“Ha’u fiar labarik Timor-oan sira iha talentu di’ak kona-ba desportu futeból. Ha’u fiar katak fornesimentu projetu konstrusaun kampu tolu ne’e bele eleva liután kapasidade labarik Timor-oan sira nian iha desportu futeból ne’e hodi sai manan na’in iha eventu olímpiku no Asian game iha futuru,” nia tenik.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here