Traballadór sira habai hela kafé iha sentru habai kafé CCT nian iha Railaco, kinta (09/07). Imajen Tatoli/António Gonçalves

DILI, 03 maiu 2021 (TATOLI)-Administradór Postu Administrativu Railaco, Munisípiu Ermera, Arlindo dos Santos, hateten abitante sira iha Postu Administrativu Railaco kuaze simu ona Cesta Bázika no hela de’it Suku Railaco Leten ho totál uma-kain 396 mak to’o agora seidauk simu Cesta Bázika.

“Kona-ba distribuisaun Cesta Bázika ba ami-nia abitante-sira iha Postu Administrativu Railaco, iha Suku sia, kompostu hosi Suku ualu simu hotu ona Cesta Bázika, hela Suku  Railaco Leten uma-kain 396, ho totál populasaun hamutuk 1.945 mak seidauk simu to’o agora,” Arlindo dos Santos hateten ba Agência Tatoli  liuhosi telefónika, segunda ne’e.

Nia afirma, Suku ualu iha Postu Administrativu Railaco ne’ebé simu ona Cesta Bázika mak hanesan, Suku Fatuquero ho totál abitante 2.292 simu hotu ona Cesta Bázika, Suku Railaco-Craic ho totál abitante 1.820 simu ona Cesta Bázika, Suku Taraço ho totál abitante 869 simu ona Cesta Bázika, Suku Deleço ho abitante 479 simu ona Cesta Bázika.

Suku Liho ho totál abitante 1.503, maibé hosi númeru ne’e hela reklamante 167 mak seidauk simu no seluk simu hotu ona Cesta Bázika, Suku Samalete ho totál abitante 1.803 simu ona Cesta Bázika, Suku Tocoluli ho totál abitante 1.845 simu ona Cesta Bázika, no Suku Matata ho totál abitante 1.966, hosi númeru ne’e reklamante uma-kain tolu ho ema hamutuk 15 mak seidauk simu Cesta Bázika no seluk simu hotu ona.

Reklamante sira ne’ebé seidauk simu Cesta Bázika, tuir nia, loloos simu hotu agora tanba sira seluk simu hotu ona, maibé  sira mós lahatene razaun  tanba kompañia ne’ebé atu distribui sasán ba benefisiáriu-sira ne’e to’o agora seidauk iha informasaun ruma ba sira.

Produtu Cesta Bázika ba Postu Administrativu Railaco mak hanesan, foos, mina, batar, fore-keli, batar-uut, susubeen, rinso, no seluk tan.

Jornalista       : Arminda Fonseca

Editór            : Francisco Simões

HAKEREK NO HATÁN

Please enter your comment!
Please enter your name here