Sekretáriu Jerál Timor-Leste Press Union (TLPU), Horácio Babo. Imajen/Espesiál.

DILI, 03 maiu 2021 (TATOLI)—Iha komemorasaun Loron Mundiál Liberdade Imprensa (World Press Freedom Day) 2021 ne’e, Timor-Leste Press Union (TLPU) husu ba jornalista sira atu goza liberdade ida-ne’e ho responsabilidade la’ós tanba liberdade ona jornalista sira haluha-aan hodi la kontribui ba kria unidade, establidade no mós tulun dezenvolvimentu iha Timor-Leste.

Notísia Relevante: SEKOMS iha esperansa jornalista hala’o knaar profisionál iha ámbitu COVID-19

“Husu ba jornalista Timor-oan sira atu goza Liberdade imprensa ho responsabilidade. La’os tanba Liberdade ona entaun haluha tiha atu kontribui hodi kria unidade no estabilidade atu dezenvolve Timor-Leste,” Sekretáriu Jerál Timor-Leste Press Union (TLPU), Horácio Babo, hateten ba Agência Tatoli liuhosi WhatsApp (WA), segunda ne’e.

Horacio Babo hatutan, iha tinan ida-ne’e Timor-Leste hanesan nasaun ida-ne’ebé nia Liberdade Imprensa aas liu iha Sudeste Aziátiku, tanba ne’e husu ba jornalista sira atu mantein prestasaun ida-ne’e no husu parte hotu atu kontribui no garante nafatin liberdade Imprensa iha Timor-Leste.

TLPU nia kontribuisaun ba liberdade imprensa iha Timor-Leste mak fó biban ba ema hotu atu hato’o sira-nia hanoin no fó biban hodi haburas demokrasia, tanba mídia sira iha Timor-Leste ezerse sira-nian funsaun ida hodi halo kontrolu sosiál ho di’ak lahó intervensaun hosi makaer ukun sira.

Aleinde ne’e, nia dehan rezultadu analize hosi Conselho de Imprensa ne’ebé haktuir katak Timor-Leste iha Liberdade maibé kualidade jornalista monu makaas ne’e, nia parte la konkorda no kestiona makaas ba rezultadu analize ne’e no CI haree hosi aspeitu saida no halao analize bazea ba padraun saida.

“Agora kona-ba kualidade Jornalista iha Timor-Leste monu makaas ne’e, Conselho de Imprensa haree hosi aspeitu saida. Ba ha’u, jornalista Timor-oan uitoan ka barak, kontribui ona ba dezenvolvimentu Timor-Leste, maske maiória Jornalista Timor-oan mai de’it ho edukasaun formál ida-ne’ebe minimu hanesan akaba ensinu sekundaria de’it,” nia hateten.

Se ida-ne’e mak akontese, entaun TLPU husu ba Cobselho de Imprensa tenke hala’o intervensaun atu eleva no hasa’e kapasidade no kualidade Jornalista Timor-oan sira-nian liuhosi investimentu ka kapasitasaun hodi bele hasa’e kapasidade Jornalista sira-nian iha futuru,” nia dehan.

Hosi TLPU nia parte, hala’o tiha ona tividade formasaun ba membru TLPU balun hanesan formasaun kona-ba Fack-Checking for Journalist no naftin halo kooperasaun ho sentru formasaun balu atu fasilita formasaun lingua hanesan portugés ho inglés, no mós halo koopersaun ho ajénsia Internasional sira hodi fó formasaun ba membru sira.

Iha pandemia COVID-19 no kalamidade klimátika ne’e, nia dehan, jornalista timor-oan barak mak lakon serbisu no balun servisu mós kompañia mídia ko’a sira-nia salariu, ne’e hanesan problema boot ida-ne’ebé jornalista timor-oan sira hasoru.

“Husu ba parte hotu nia tulun atu bele hanoin no fó atensaun mós ba jornalista sira liu-liu ba kompaia sira-ne’ebe fó servisu ba jornalista sira, katak favór ida labele uza de’it jornalista sira iha tempu di’ak hodi kontribui ba ita-boot sira-nia kompañia maibé husik sira servisu iha situasaun defisil ne’e hodi bele sustenta sira-nia moris,” nia fó hanoin.

TLPU mós husu ba parte hotu liu-liu ba Estadu atu bele tau atensaun mós ba setór komunikasaun liu-liu ba servisu nain hanesan jornalista sira tanba iha situasaun defisil hanesan ne’e, jornalista sira-nia kontribuisaun importante la halimar hodi divulga informasaun ba povu.

Tuir relatóriu hosi Reporters Without Borders (RSF) 2021 ne’e hatudu, Timor-Leste okupa Páis Primeiru Lugar iha ASEAN ba Liberdade imprensa. Iha tinan 2021 ne’e, index ba Liberdade imprensa mundiál hatuur Timor-Leste hetan rangking 71 kompra ho nasaun membru ASEAN sira seluk hanesan Malázia okupa 19, Indonézia 113, Singapura 160, Cambodia 144, Filipina 138, no Thailandia okupa ranking 137.

Notísia Relevante: Governu kongratula loron mundiál liberdade imprensa

Jornalista: Domingos Piedade Freitas

Editor: Cancio Ximenes

HAKEREK NO HATÁN

Please enter your comment!
Please enter your name here