Jornalista sira bainhira halo kobertura iha ámbitu luta kontra COVID-19. Imajen TATOLI/Egas Cristóvão

DILI, 03 maiu 2021 (TATOLI)—Bankada Partidu Demokrátiku iha uma fukun Parlamentu Nasionál parabeniza loron mundiál Liberdade imprensa no konsidera mídia nu’udar klamar no lalenok ba demokrasia.

Notísia Relevante: PM felisita jornalista timor-oan komemora loron liberdade imprensa

Deputada Bankada PD, Eliva Sousa, aproveita loron mundiál Liberdade imprensa ne’e hato’o parabens ba jornalista sira hotu.

“Ami husu jornalista sira hasa’e kualidade produtu jornalístiku iha mídia oioin hanesan rádiu, imprime, online no mós eletrónika. Ami bankada PD konsidera mídia mak sai hanesan klamar no lalenok ba demokrasia,” Deputada Elvina Sousa informa liuhosi plenária Parlamentu Nasionál, segunda ne’e.

Bankada PD konsiente katak papél hosi jornalista sira importante tebes ba iha demokrasia no ba prosesu dezenvolvimentu nasaun nian.

“Ho ida-ne’e ami husu ba jornalista sira atu uza loron ida ohin sai hanesan loron reflesaun atubele hasoru dezáfiu hotu ne’ebé mak sira hasoru hodi bele transforma sai hanesan sira-nia mehi atubele hakat hosi dezáfiu sira-ne’e hotu,” Deputada Elvina Sousa fó hanoin ba jornalista sira hotu.

Nia husu jornalista sira hotu atu kapasita-aan nune’e bele fornese informasaun liuhosi produtu jornalístika ida-ne’ebé mak kualidade ba povu.

Tuir observasaun Agência TATOLI durante sesaun plenária, únika Deputada Bankada Partidu Demokrátiku ne’e mak fó netik mensajen ba loron mundiál ne’e no restante foti asuntu sira seluk.

Iha tinan 1993, Asembleia Nasaun Unida proklama loron 3 maiu hanesan loron atu komemora prinsipiu báziku Liberdade imprensa, hodi sukat Liberdade Imprensa Mundiál. Hahú hosi 3 maiu ne’e mundu selebra atu defende Liberdade imprensa no fó rekuñesimentu ba jornalista sira-ne’ebé mate bainhira hala’o hela sira-nia profisaun nu’udar jornalista.

Loron 3 maiu hanesan loron ida-ne’ebé sadik inisiativa públiku atu luta no defende Liberdade imprensa. Loron Mundiál Liberdade Imprensa mós sai hanesan momentu ida atu fó hanoin ba Governu no Estadu atu respeita sira-nia kompromosiu ba liberdade imprensa ne’e.

Iha loron 3 maiu ne’e mak komunidade jornalista sira iha mundu tomak sei halo promosaun kona-ba prinsipiu báziku Liberdade Imprensa no fó rekuñesimentu ba jornalista sira-ne’ebé mate iha terrenu bainhira hala’o hela sira-nia knaar.

Notisia Relevante: SEKOMS iha esperansa jornalista hala’o knaar profisionál iha ámbitu COVID-19

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here