Membru PNTL blokeia pontu entrada iha Tasi-Tolu hodi haruka fila transporte publiku (anguna) ne'ebé tula modo husi Liquiça no Ermera atu mai fa'an iha Dili, segunda 3 maiu 2021. Imajen Tatoli/Antonio Goncalves

DILI, 03 maiu 2021 (TATOLI)-Prezidente Autoridade Munisípiu Ermera, José Martinho dos Santos, husu ba Ermera oan sira ne’ebé buka moris no hala’o estuda iha Kapitál Dili, tenke halo tuir regra situasaun serka sanitária no konfinamentu obrigatóriu ne’ebé aplika iha Dili.

José Martinho dos Santos husu abitante-sira labele halo viajen ilegál ba Munisípiu Ermera tanba Munisípiu Ermera agora rejistu kazu pozitivu ba COVID-19 númeru aumenta tanba hahalok abitante-sira ne’ebé halo viajen ilegál ba Munisípiu Ermera.

“Ha’u husu ba abitante-sira ne’ebé hela iha Dili tenke respeita orden Estadu nian ne’ebé daudaun ne’e aplika serka sanitária no konfinamentu obrigatóriu iha kapitál Dili. Hotu-hotu tenke hakmatek iha fatin no labele aproveita situasaun ida-ne’e halo viajen ilegál mai Ermera,” José Martinho dos Santos, ba Agência Tatoli liuhosi telefónika, segunda ne’e.

Kona-ba rezolusaun Governu nian ba renovasaun impozisaun serka sanitária iha Munisípiu Ermera, nia dehan, daudaun ne’e polítika ne’ebé sira uza atu kombate COVID-19 iha Ermera mak kontinua asegura protokolu saúde públiku.

Kona-ba atividade no movimentu transporte no ema, inklui atividade misa no eskola nian iha munisípiu Ermera, nia dehan, daudaun ne’e atividade kontinua la’o normal tanba Munisípiu Ermera aplika de’it serka sanitária la’ós konfinamentu obrigatóriu.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here