Hakerek nain, Renato da Costa.

Hosi: Renato da Costa

Loron 3 fulan-maiu fó hanoin hikas ba públiku liuliu Estadu hodi fó onra ba kompromisu konaba liberdade imprensa. Loron ne’e sai momentu reflesaun ba profisionál mídia sira konaba liberdade imprensa ho étika profesionál nian ba atividade serbisu lorloron hodi hato’o informasaun ba públiku hodi kumpri ba regra profisaun nian ne’ebe iha.
UNESCO iha ninia konkluzaun ba selebrasaun tinan ne’e hateten urjente tebes ba Nasaun sira hodi rekonese mudansa iha sistema komunikasaun fó impaktu ba saúde, direitu ema-nian, demokrasia no dezenvolvimentu sustentável. Ho nune’e, hodi fó importánsia ba informasaun iha ekosistema foun ne’e importante tebes hodi aborda kestaun sira atuál konaba viabilidade mídia nian ho plataforma transparénsia no alfabetizasaun konaba kapasidade hodi uza aparellu sira ne’e. Ikus liu UNESCO mos fó lembra importánsia husi komemorasaun ne’e hodi bele valoriza informasaun nu’udar bens públiku hodi hametin serbisu jornalismu kona-ba promosaun transparénsia ho empoderamentu hodi la-husik ema ida iha kotuk.
Iha tinan ne’e, selebrasaun sai mos tinan aniversáriu ba dala 30 husi Deklarasaun Windhoek, Namibia iha tinan 1991 ne’ebé inisia husi jornalista Afrikanu sira hodi ezije atu iha liberdade imprensa ba kontinente Afrikana ne’ebé independente no pluralista.

Deklarasaun Windhoek sai inspirasaun ba Nasaun membru Nasoins Unidas hodi deklara 3 maiu nu’udar loron mundiál ba liberdade imprensa iha tinan 1993, bainhira Alain Modoux, inisiadór ida ne’ebé hamosu hanoin konaba loron mundial ba liberdade imprensa iha ninia livru ” Pressing for freedom: 20 years of World Press Freedom Day “ ne’ebé públika husi UNESCO iha tinan 2013, hateten “Enkontru istóriku ne’ebé organiza husi UNESCO no Nasoins Unidas hodi halibur jornalista Afrikanu besik ema 60 ne’ebé sai vanguarda iha prosesu demokrátiku ne’ebé gradualmente aumenta iha kontinente Afrika depois guerra fria”.

Deklarasaun Windhoek sai referénsia iha kontestu internasionál konaba estabelesimentu liberdade imprensa ho nia pluralismu inklui ninia independénsia rasik hodi husu asembleia jerál Nasoins Unidas deklara loron 3 maiu nu’udar loron mundiál liberdade ba Imprensa liuhusi rezolusaun númeru 48/432, 20 dezembru 1993.

Ba Timor-Leste, komemorasaun ihs tinan 2021 sai mos lisaun no reflesaun ba ita hodi haree hamutuk konaba linha koordenasaun serbisu mídia no instituisaun Estadu iha Timor-Leste durante ne’e bainhira fornese informasaun iha espasu públiku, liuliu luta kontra COVID19 ne’ebé mak oras ne’e alastra iha munisipiu hotu.

Lema “Informasaun nu’udar bens públiku” haktuir husi Nasoins Unidas konsidera nu’udar apelu hodi afirma konaba importánsia hodi valoriza informasaun nu’udar bens públiku hodi esplora saida de’it mak bele prodús inklui distribuisaun ho ninia konteúdu hodi hametin serbisu jornalismu nian liuhusi promove transparénsia ba informasaun ne’ebé mak iha, obriga atu ita hotu re-inisiativa fali konteudu tomak husi informasaun hotu ne’ebé durante ne’e partilla ba públiku.

Ho hanoin ida katak asesibilidade ba informasaun husi journalista sira nu’udar dimensaun ne’ebé afeta mos servisu públiku. Buat sira ne’e bazeia ba hanoin ida katak substánsia konaba jestaun informasaun públika oras ne’e hetan atensaun boot husi parte hotu, tantu governu no instituisaun públika sira seluk. Informasaun públiku nu’udar direitu báziku ne’ebé presiza tebes atua husi instituisaun públika hodi divulga ba interese públiku nian. Tanba ne’e tinan 2021 ho lema husi loron mundiál ba liberdade imprensa nesesáriu ba ita hotu hodi tau hamutuk hanoin hodi dezenvolve sistema ho ninia métodu serbisu informasaun públiku ne’ebé viavel ba parte hotu.

Disponibilidade informasaun tenke atualizada nafatin ho transparente nu’udar nesesidade absoluta ho forma ne’ebé fásil hodi asesu bazeia ba públiku nia preokupasaun iha teritoriu laran.

Husi pontu de vista ne’ebé mak ita observa durante ne’e, eziste kauza prinsipál tolu ne’ebé mak sai ita hotu nia preokupasaun ein-relasaun ho informasaun ne’ebé mak durante ne’e transmite ba públiku, tantu husi ajénsia governamentál no instituisaun mídia sira konaba esforsu hodi konvense públiku konaba medida sira kontra propogasaun surtu COVID-19 ho informasaun ne’ebé klara.

Dahuluk fenómenu husi informasaun konaba surtu husi pandemia COVID -19. Bainhira elementu hotu iha sosiedade iha hela esperansa konaba serteza husi informasaun surtu COVID -19 husi governu, públiku mos hetan informasaun husi mídia sira ho tipu informasaun síniku konaba tratamentu ou atuasaun hodi prevene propagasaun surtu ne’e. Públiku kontinua hela ho konfuzaun. Situasaun sai agrava liu bainhira instituisaun governamentál sira husik de’it informasaun sira ne’e sirkula livre iha sosiadade nia leet ho ida idak nia presupostu.

Daruak, desde propagasaun surtu Covid ataka Timor-Leste iha tinan kotuk, públika nakonu ho informasaun ho karáter hoax tantu husi mídia online, imprimi ate informasaun ne’ebé sirkula husi kada pesoál iha rede sosiál la’o livre tebes ne’ebé to’o ohin loron seidauk hetan solusaun. Ikus mai, hoax ne’ebé realmente require verdade konsidera informasaun ne’ebé mak loos tanba de’it laiha instituisaun offisiál ida mak barani halo klarifikasaun ba informasaun hirak ne’e. Kazu husi Vera Krús, ne’ebé tuir loloos sai momentu importante hodi hasae públiku nia konfiansa ba informasaun sira ne’ebé mak hato’o husi mídia hodi ajuda governu ba luta ne’e , sai tiha fali kampanha konaba COVID-19 iha Timor-Leste nu’udar COVID-19 inventadu. Iha situasaun hirak hanesan ne’e, públiku kontinua moris iha dúvida nia laran tanba de’it informasaun sira ne’e la mai ho lia loos ba parte hotu.

Datoluk, instituisaun governamentál ne’ebé responsavel ba área informasaun la pró-ativa harii linha koordenasaun hodi kanaliza informasaun ho sistematiku ba entidade mídia sira hodi fortifika konteudu informasaun hirak ne’e. Liuliu oinsá mídia sira bele hamosu konkordánsia ida hamutuk ho instituisuan Estadu iha luta kontra surtu ne’e ho konkordánsia ida katak promove informasaun saudavel hodi nune’e públiku bele partisipa ativa iha prosesu tomak konaba luta kontra COVID-19. Ho modelu kampanha liuhusi kolaborasaun mídia nian, governu funsiona ona ninia papel konaba hato’o informasaun loloos ba públiku hodi konsientiza públiku liuhusi utiliza aparellu komunikasaun ne’ebé ezisti iha país ne’e.

Fenómenu husi aspeitu tolu ne’e difísil atu ita separa bainhira boa vontade hodi hadi’a jestaun kanalizasaun informasaun ba públiku konaba COVID19 ita la realiza iha terenu. Tanba, kauza loloos husi problema ne’e mak, konstrusaun linha koordenasaun informasaun ba interesse públiku oinsá mídia no instituisaun Estadu atu pro-ativa harii kumpromisu konaba valór informasaun ba interese públiku hodi hases tiha identidade polítika. Tanba mídia no instituisaun governamentál nu’udar instituisaun sosiál ne’ebé komunga valór katak serbisu ba interese públiku. Realmente buat ne’ebé ita hotu akompanha oras ne’e hatudu katak linha koordenasaun hodi opta modelu serbisu konaba hasae públiku nia konfiansa husi informasaun sira ne’ebé mak fornese tantu husi instituisuan Estadu no mídia sira seidauk hatudu rezultadu másimu.

Saida mak ita tenke halo
Informasaun nu’udar bens públiku konsidera hanesan estrada públiku ne’ebé kualker ninia sidadaun uza ho transporte ne’ebé mak iha. Iha estrada públiku, iha mos sinál no regra tranzitu lubuk ne’ebé kada motorista tenke respeita hodi evita asidente entre motorista sira.

Tuir prinsípiu ema ekonomista sira, karakterístika bens públiku ne’e iha oin rua, laiha rivalidade no la esklui ema seluk. Ho nune’e, bens públiku nu’udar bens ne’ebé la limita atu ema seluk uza mos sasan hirak ne’e inklui impede ema hodi uza mos ba sira nia benefisiu. Hanesan direitu ba iha asesu dalan, direitu hodi hetan lia loos no mos direitu hodi hetan protesaun ba seguransa nian inklui mos direitu atu hetan informasaun ba interese públiku nian.

Ho nune’e, iha situasaun sira hanesan ne’e, informasaub hirak ne’ebé la másimu hato’o husi meiu komunikasaun estatál nian bainhira públiku hein hela informasaun ne’ebé loloos konaba situasaun hotu, obriga tebes ona atu revee medida aprosimasaun hirak ne’e. Liu liu entre meiu komunikasaun komersiál ho instituisuan Estadu responsavel iha área refere konaba oinsá harii luta kolektivu hasoru COVID-19 hodi fornese informasaun viavel sira.

Governu tenke hamosu inisiativu ho plataforma serbisu konaba fornese informasaun ba públiku husi fontes ne’ebé klara konaba luta kontra Covid. Ho inovasaun hirak ne’e hodi investe iha mídia komersiál sira konaba luta kontra COVID-19, ha’u fiar katak jornalismu mídia komersiál sira sei sai autór linha frente hodi aprezenta informasaun korreta ne’ebé sei fó benefísiu ba povu no Estadu iha luta kontra COVID19.

Ho nune’e reflesaun konaba informasaun nu’usar bens públiku sai momentu sertu ba sosiedade hotu liu liu orgaun titulár sira ho firmi hodi hakat ba oin, nune’e públiku bele hetan informasaub ho fontes ne’ebe klara. Momentu ida ne’e mos sai diskursu ita hotu nian katak funu kontra COVID -19 la’os de’it mai husi parte ida maibé involve mos kamada sosiál sira seluk liuhusi informasaun ne’ebé fornese husi mídia sira tantu estatál no privadu ho modelu ‘rona malu’ konaba halerik hirak ne’ebé ninia lian seidauk transmiti ho informasaun ne’ebé saudavel hodi harii jestaun ne’ebé mais komprensivu.

Iha parte seluk, ba Timor-Leste bainhira ita ko’alia konaba informasaun nu’udar bens públiku, importante tebes mak papel governu oinsá públiku iha direitu hodi hetan informasaun haktuir husi lei ne’ebé mak iha. Tanba , direitu hodi hetan informasaun ajuda tebes públiku hodi sai pro-ativa kontrola no ajuda fornese hanoin hotu konaba desizaun governu nian. Ho nune’e governu asumi duni ninia responsábilidade ho jestaun administrasaun estaduál. Iha parte seluk, direitu hodi hetan informasaun ajuda tebes kada governu iha kualker desizaun hotu ne’ebé governu ezekuta liuliu ba interese públiku nian bainhira ita ko’alia konaba transparénsia. Loron ida ohin, fanun ita hotu hodi haree hamutuk katak bainhira laiha medida rigór konaba garante informasaun públiku, ita sei labele halo buat ida tanba informasaun domina husi parte ida. Ho nune’e, obriga mos ita hotu hodi tau hamutuk hanoin konaba urjentimentu atu koloka mos asuntu konaba direitu ba informasaun, divulgasaun informasaun nu’udar baze jurídiku bainhira ita ko’alia informasaun nu’udar bens públiku. Bainhira ita laiha aparellu lei ne’ebé mak forte hodi garante públiku hodi asesu informasaun viavel sira, ita nia maluk journalista sira sei kontinua haknaok informasaun ba interese públiku husi dalan kotuk hodi sai notísia iha kobertura lor loron.

Iha biban ne’e, hakarak hato’o ha’u nia parabéns ba maluk jornalista Timor oan hotu iha ne’ebé de’it ba loron espesiál ohin loron nian. Imi nia dedikasaun durante ne’e, hatudu ona sinál hodi avansa ba oin ho firmi maske imi enfrenta limitasaun barak iha serbisu lorloron.

Hato’o mos parabéns ba Governu maske ho limitasaun konaba tratamentu ne’ebe dalaruma ladun másimu ba maluk jornalista sira maibé relatoriu 2021 ne’ebé públika husi Reporters Without Borders (RSF) konaba índise liberdade imprensa mundiál hatudu Timor-Leste okupa pozisaun 71 husi Nasaun 180 ne’ebé hetan rejistu husi RSF konaba kiberdade imprensa nian. Iha rejiaun ASEAN, Timor-Leste okupa primeiru lugar (71) kompara ho país ASEAN sira seluk hanesan Indonézia (113), Malázia (119), Tailándia (137), Filipina (138). Myánmar (140) ne’ebé oras ne’e hetan ameasa polítika rai-laran hatudu liberdade imprensa di’ak liu kompara ho Brunei (154), Singapura (160) no Vietname (175).

Hakerek nain hanesan observadór mídia no komunikasaun.

HAKEREK NO HATÁN

Please enter your comment!
Please enter your name here