Atividade Petrolífera iha kampu Bayu-Undan. Imajen/Conocophillips

DILI, 03 maiu 2021 (TATOLI)-Banku Sentrál Timor-Leste (BCTL, sigla portugés) lansa relatóriu trimestrál fundu mina-rai Timór-Leste ba da-LVII, ne’ebé kobre períodu 01 janeiru to’o 31 marsu 2021.

“Relatóriu ne’e hatudu katak kapitál fundu iha trimestre ikus ne’e mak biliaun US$18,98, kompara ho biliaun $18,99 iha fim trimestre dahuluk,” refere nota imprensa ne’ebé Agência TATOLI asesu, segunda ne’e.

Relatóriu ne’e hatudu katak totál reseita iha trimestre ne’e hamutuk millaun $54,18, ne’ebé kompostu hosi kontribuisaun kontribuinte sira ba fundu hamutuk millaun $31,76 no pagamentu royalty ne’ebé simu hosi Autoridade Nasionál Petróleu (ANP) hamutuk millaun $22,41.

Nune’e, osan kontadu líkidu ne’ebé sai hosi fundu durante trimestre ne’e hamutuk millaun $202,03, kompostu hosi millaun $200 transfere ba Orsamentu Jerál Estadu (OJE) no millaun $2,03 kobre kustu jestaun.

Enkuantu, rendimentu hosi investimentu fundu ne’e hamutuk millaun $150,75, kompostu hosi kupaun no juru ne’ebé simu hamutuk millaun $76,11, ho mudansa iha valór merkadu nian millaun $75,31 no movimentu cambiais lakon mak  millaun -$0,66 iha  trimestre ne’e.   

“Ne’e rezulta rendimentu ba  karteira fundu nian durante trimestre ne’e 0,76%, enkuantu rendimentu sasukat (benchmark) ba períodu ne’e mak 0,46%,” esplika nota hosi BCTL.

Reseita líkidu durante trimestre ne’e hamutuk millaun -$145,82, ne’ebé reseita portofoliu iha períodu ne’e mak 0,76% kompara ho retornu referénsia mak 0,46%.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here