Deputada Bankada PLP, Maria Angelina Sarmento Lopes. Imajen/Egas Cristovão

DILI, 03 maiu 2021 (TATOLI)—Reprezentante povu iha uma fukun Parlamentu Nasionál, husu ba Governu liuhosi Ministériu Edukasaun, Juventude no Desportu (MEJD) atu apoia rekursu hodi reforsa servisu Komité Orientadora (KO 25) nune’e fasilita hala’o estudu, peskiza no hakerek ba istória frente klandestina nian.

Notísia Relevante: PLP husu Governu kria kondisaun ba juventude Frente Klandestina

Deputada Bankada Partidu Libertasaun Popular (PLP), Maria Angelina Lopes Sarmento, haktuir Governu kria ona Komité Orientadór 25, maibé presiza reforsa tán rekursu sufisiente ba KO 25 ne’e.

“Iha parlamentu ne’e ha’u rasik ho deputadu Assanami mós hola-parte atu hakerek, estudu no peskiza ba partisipasaun juventude rezisténsia sira-nian. Ami husu atu Ministériu Edukasaun, Juventude no Desportu, atu apresia prosesu ida-ne’e, fó apoiu rekursu ne’ebé natoon atu sira bele kontinua halo sira-nia servisu ida-ne’e,” Deputada PLP ne’e levanta liuhosi plenária, segunda ne’e.

Tanba tuir nia, KO 25 ne’e rekolla dadus, halo estudu ba istória rezisténsia hotu iha frente klandestina nian atu nune’e istória hakerek iha livru ida no sai memoria institusionál ba jerasaun futuru.

“Ami hanesan membru Komité Orientadór 25, aproveita opurtunidade ida-ne’e, husu ba Governu, liuliu MEJD atu tau konsiderasaun ba ami-nia preokupasaun ida-ne’e.

Entreantu Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, sei enkamiña asuntu ne’e ba ministériu relevante.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here