Telekonferénsia entre Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ho komitiva no Responsável Rádiu Komunidade, iha Gabinete MAPKOMS, Palásiu Governu. Imajen/MAPKOMS

DILI, 03 maiu 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ho komitiva hala’o sorumutuk ho Responsável Rádiu Komunidade sira liuhosi telekonferénsia.

Durante sorumutuk, Ministru rona opiniaun hosi dirijente sira kona-ba dezenvolvimentu Rádiu Komunidade no ninia sustentabilidade iha futuru.

“Relasiona ho situasaun rua ne’e maka papél Rádiu Komunidade importante atu transmite informasaun ne’ebé loloos no kredível kona-ba prevensaun vírus, nune’e la infeta komunidade ho númeru boot no partilla informasaun sira ne’ebé adekuadu hodi alivia sofrimentu povu tanba hasoru kalamidade,” Ministru dehan liuhosi nota imprensa ne’ebé Agência TATOLI asesu, segunda ne’e.

Iha biban ne’e, Responsável Rádiu Komunidade sira aprezenta problema internet ne’ebé sempre falla bainhira atu partilla informasaun liuhosi live streaming inklui ekipamentu servisu hanesan komputadór no mixer ne’ebé a’at inklui kondisaun edifísiu la favorável atu hala’o servisu.

Maski enfrenta problema oin-oin, Rádiu Komunidade sira nafatin halo esforsu hodi koopera ho autoridade lokál, nune’e kontinua divulga informasaun ba komunidade kona-ba prevensaun propagasaun vírus COVID-19 no dezastre naturál hanesan problema sériu ne’ebé povu Timor-Leste enfrenta daudaun ne’e.

Tuir Ministru, sei tau konsiderasaun ba kestaun ne’ebé dirijente sira koloka no sei halo diskusaun ho parte relevante sira atu buka solusaun ba problema ne’e.

Nune’e, MAPKOMS hein katak ho reuniaun via plataforma dijitál ne’e, Rádiu Komunidade sira hahú dezenvolve programa ne’ebé elaboradu ona, nune’e bele fó solusaun ba problema no dezafiu no Governu mós sei nafatin fó apoiu hodi garante ezisténsia Rádiu Komunidade iha futuru.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here