Reuniaun Konsellu Administrasaun Fundu Infraesturtura (KAFI), iha salaun Ministériu Finansa, Aitarak-laran, segunda (03/05). Imajen TATOLI/Egas Cristóvão

DILI, 03 abríl 2021 (TATOLI)-Ekipa task force Diresaun Nasionál Obra Públika hosi Ministériu Obra Públika (MOP) no Ajénsia Dezenvolvimentu Nasionál (ADN), finaliza ona dezeñu no Bill of Quantity (BoQ) no submete ona ba  Komisaun Nasionál Aprovizionamentu (CNA, sigla portugés) atu prepara aprovizionamentu atubele halo rekuperasaun estrada iha Hospital Nasional Guido Valadares (HNGV) nia kotuk iha Bidau.

Diretór Jerál Obra Públika no Koordenadór grupu tékniku ba ekipa task force, Rui Hernani, hateten, ekipa aprezenta ona dezeñu no BoQ ba Konsellu Administrasaun Fundu infraestrutura (KAFI).

“Ami aprezenta ona materiál ka dezeñu ba KAFI no deside ona entrega ba CNA atu halo ezersísiu aprovizionamentu hodi bele halo rekuperasaun imediata ba estrada kotu iha HNGV nia kotuk, iha área Bidau,” Koodenadór grupu tékniku informa ba Agência TATOLI, hafoin ramata reuniaun KAFI, iha salaun Ministériu Finansa, Aitarak-laran, segunda ne’e.

Nia dehan, CNA mak sei deside empreza ne’ebé envolve iha rekuperasaun infraestrutura públika no halo kontratu tuir parte legál ho baze ba empreza ninia kapasidade tékniku no finanseiru.

“CNA mak deside, hafoin empreza rekupera ka implementa tuir dezeñu ne’ebé iha,” nia akresenta.

Aleinde ne’e, iha reuniaun KAFI ne’e, kontinua aprofunda informasaun atubele rekupera imediata estrada dirasaun mota iha RTK ba dirasaun Maloa bá Tuana-laran, estrada ligasaun Tibar bá Ermera, Ponte Loes, Ponte Bekusi no estrada CPLP ba tasi ibun Bebonuk inklui estrada Bidau iha HNGV nia kotuk.

Nune’e, Resposavél ne’e dehan, kuaze dezeñu no BoQ finaliza ona, hafoin entrega ba ADN hodi halo verfikasaun mak entrega ba CNA atu prosesa aprovizionamentu.

“Ami esforsu hela, semana ida tan ami finaliza hotu dezeñu sira atubele hahú verifikasaun no halo rekuperasaun imediata,” nia hatutan.

Nia dehan, kona-ba Ponte Loes no Bekusi iha Taibesi, submete ona termu referénsia ba ADN atu halo verifikasaun ba dezeñu sira.

“Ponte Bekusi ita hein dezeñu finaliza mak bele sobu pakote ida no harii foun, enkuantu Ponte Loes sei halo rekuperasaun temporáriu hodi kontinua ba rekuperasaun difinivita tanba ponte ne’e presiza  prepara dezeñu atu rekonstrui ho kualidade,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here