Atividade iha sala plenária Parlamentu Nasionál. Imajen TATOLI/António Gonçalves.

DILI, 05 maiu 2021 (TATOLI)—Bankada Frente Revolusionária Timor-Leste Independente (FRETILIN) husu Governu halo teste swab ba públiku, liuliu ba populasaun sira-ne’ebé ba sosa aimoruk iha klínika sira tanba ikus ne’e populasaun lakohi ba sentru saúde no ospitál.

Deputadu Bankada FRETILIN, Fabião de Oliveira, haree katak klínika privada sira-ne’ebé agora daudaun iha kapitál Dili barak kontinua loke atubele halo tratamentu ba pasiente sira-ne’ebé iha Dili no mós sira-ne’ebé mai hosi munisípiu maibé serka sanitária entaun populasaun sira hosi munisípiu labele tama.

“Ha’u fó hanoin ba Governu liuhosi Ministériu Saúde atu klínika privada sira-ne’e mós prepara halo teste swab tanba ita-nia pasiente ka komunidade balun moras ne’ebé ke grave maibé prefere liu ba iha klínika,” Deputadu Fabião de Oliveira, levanta liuhosi plenária, segunda ne’e.

Klínika privadu sira-ne’ebé eziste iha kapitál Dili presiza aplika teste swab ba pasiente sira-ne’ebé ba halo tratamentu nune’e deskobre pasiente ne’e pozitivu ka negativu.

Reprezentante povu ne’e fó hanoin ba Ministériu Saúde rejista klínika privada sira-ne’ebé eziste iha kapitál Dili no fó orientasaun bele halo teste swab.

Entreantu Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, sei enkamiña asuntu ne’e ba ministériu relevante.

Jornalista: Evaristo Soares Martins

Editór: Cancio Ximenes 

HAKEREK NO HATÁN

Please enter your comment!
Please enter your name here