Sidadaun 24 hein prosesu identifikasaun iha Komandu PNTL, Caicoli, domingu (02/05). Imajen/FB

DILI, 02 maiu 2021(TATOLI)—Komandu Polísia Nasionál Timor-Leste (PNTL) munisípiu Dili, detein sidadaun 24 ne’ebé halo ezersísiu fíziku dadeer ne’e iha tasi-ibun.

Tuir Segundu Komandante PNTL munisípiu Dili, Superintendente, Euclides da Costa Belo, detensaun ne’e bazeia ba komprimentu Rezolusaun Governu númeru 45/2021, 29 abríl, kona-ba mantein impozisaun konfinamentu domisiliáriu jerál populasaun munisípiu Dili no Dekretu Governu 14/2021 kona-ba medida ezekusaun deklarasaun Estadu Emerjénsia.

“Komandu PNTL munisípiu Dili, halo operasaun desde horiseik. Ohin hahú tuku 05:00 dadeer kontinua iha fatin sidadaun sira uza sai fatin desportivu hanesan tasi-ibun no hetan duni na’in-24 halo ezersísiu, daudaun sira submete ba identifikasaun prosesuál,” Superintendente, Euclides da Costa Belo, hateten iha Komandu PNTL, Caicoli, domingu ne’e.

Notísia relevante: Governu reativa hikas konfinamentu domisiliáriu obrigatóriu jerál iha Dili

Atividade operasaun ne’e hamutuk ho Eskuadra Na’in-Feto, Cristo Rei, no Vera Cruz.

Antes ne’e, Governu liuhosi reuniaun Konsellu Ministru aprova Projetu Rezolusaun Governu ba renovasaun impozisaun serka sanitária iha munisípiu neen hanesan, Ainaro, Baucau, Dili, Ermera, Covalima no Viqueque, ba loron 14 tan, to’o tuku 23:59 loron 16 maiu 2021.

Nune’e mós, Prezidente Repúblika, Francisco Guterres ‘Lú Olo’, dekreta renovasaun Estadu Emerjénsia da-XIII, ne’ebé abranje territóriu nasionál tomak no vigora entre tuku 00:00 loron 03 maiu no tuku 23:59 loron 01 juñu 2021.

Bazeia ba Rezolusaun Governu númeru 45/2021, 29 abríl, kona-ba mantein impozisaun konfinamentu domisiliáriu jerál populasaun munisípiu Dili, iha pontu 22 to’o 25 esplika katak Autoridade Polisiál halo fiskalizasaun komprimentu regra Rezolusaun Governu no observa bainhira iha sidadaun la kumpre konsidera hanesan prátika krime dezobediénsia no bele komunika ba Ministériu Públiku.

Bainhira identifika ema estrajeiru la kumpre regra, Autoridade Polisiál komunika ho Servisu Imigrasaun.

Aleinde ne’e, PNTL sei intensifika operasaun kontrolu ba komprimentu medida Rezolusaun Governu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here