Estudante-sira simu rezumu matéria iha eskola. Imajen Tatoli/Egas Cristóvão

DILI, 02 maiu 2021 (TATOLI)–Diretór Eskola Ensinu Sekundáriu Jerál (ESJ) 04 Setembru UNAMET Balide, Sérgio da Cruz, hateten, parte eskola prepara ona rezumu matéria hodi distribui ba estudante hamutuk 4.155, ne’ebé mai foti diretamente iha eskola, maibé maioria seidauk mai foti.

“Estudante barak mak hela dook no laiha transporte, tanba ne’e sei falta estudante 85% maka seidauk foti rezumu matéria. Maibé, ita kontinua hein nafatin iha eskola atu sira bele mai foti,” Diretór eskola, relata ba Agência TATOLI, iha resintu eskola ESJ 04 Setembru UNMAET, Balide, domingu ne’e.

Tuir Responsável ne’e, antes ne’e parte eskola iha ona hanoin atu kria grupu via WhatsApp hodi mantein kontaktu ho inan-aman sira no fasilita estudante sira asesu informasaun hosi eskola, maibé maioria laiha telemóvel ne’ebé disponível ho plataforma.

“Parte eskola hasoru difikuldade distribui rezumu matéria no lahatene estudante sira-nia paradeiru,” nia akresenta.

Maneira ne’ebé parte eskola aplika maka kontinua hein estudante sira foti matéria iha eskola.

“Maski lahatene to’o bainhira maibé ami-nia obrigasaun tenke hein, atu nune’e estudante bele hetan rezumu matéria hodi lori bá uma atu halo preparasaun,” nia hatutan.

Nune’e mós, Koordenadór Eskola Ensinu Báziku Filiál (EBF) siklu 1o no 2o Fatuhada, Zacarias da Conceição, informa, katak eskola ne’e ramata ona halo distribuisaun rezumu matéria.

“Inan-aman sira maka mai foti tanba antes ne’e iha ona avizu, ne’ebé laiha estudante ida mak marka prezensa iha eskola,” nia dehan.

Tuir Responsável ne’e, rezumu matéria ne’ebé mak parte eskola prepara hamutuk hitu hanesan lian portugés, lian tetun, estudo do meio, matemátika, relijiaun no morál, arte no kultura, no  saúde ijene.

“Parte eskola aumenta tan matéria disiplina ida mak hanesan Edukasaun Sívika maski estudante siklu 1o no 2o seidauk hetan, maibé parte eskola halo preparasaun hotu ba estudante sira,” nia subliña.

Jornalista: Tomé Amado

Editora: Julia Chatarina

HAKEREK NO HATÁN

Please enter your comment!
Please enter your name here