Sherley Siki, Estudante Mestradu iha Fakuldade Siénsia no Komunikasaun Universidade Atma Jaya Yogyakarta.

Husi: Sherley Siki

Iha era dijitál ohin loron, modelu konsumu informasaun iha sosiedade nia leet hetan ona mudansa barak. Sosiedade la’ós ona sai konsumidór de’it maibé prodús mós informasaun no fahe liuhusi rede sosiál sira.

Dadus ikus liu husi UNESCO hatudu katak, 70% husi populasaun globál, liuliu joven sira hala’o atividade liuhusi espasu online. Iha eskala nasionál, bazeia ba dadus husi website “We are Social” (2021), populasaun rihun 515,1 ka 39% husi totál populasaun Timor-Leste mak hetan ona asesu ba internet.

Kada loron ema kria no konsumu informasaun oin-oin ho linguajen, dezeñu gráfiku, imajen no lian sira iha espasu online, liu-liu rede sosiál hodi fahe valór sira, prinsípiu nomós esperénsia pesoál sira ba ema seluk. Númeru produsaun informasaun oin-oin ne’ebé mósu sai hanesan tsunami iha espasu online hodi lori mos ameasa balun bainhira mósu grupu buzzer oin-oin ne’ebé fó polusaun ba mundu online.

Buzzer nu’udar grupu ka pesoál ruma ne’ebé uza konta falsu iha mídia sosiál, sem iha identidade loos ka bele mós dehan sira subar sira nia án iha account falsu hodi fahe informasaun ho motivu ekonómiku ka polítiku ruma. Iha inisiu, ezisténsia, Buzzer iha sidadaun nia leet hanesan buat baibain ida tanba ho objetivu promove sira nia produtu balun. Maibé sira nia imajen hahú sai negativu bainhira involve iha atividade polítika no negósiu foer sira. Konteudu ne’ebé buzzer sira prodús maioria maka liafuan odio (hate speech), hodi ofende, hamoe no atu hatun parte balun.

Haree ba fenómenu iha leten ne’ebé agora dadaun sai trend iha espasu online, dezafiu boot ida mak oinsá ita bele hatene katak informasaun ne’ebé ita konsumu ne’e di’ak no loos, liliu iha situasaun ne’ebé nakonu ho inserteza hanesan tempu pandemia COVID-19 agora ne’e.

Nu’udar meiu hodi kombate hoax, nasaun barak dadaun ne’e ativu ona hala’o kampaña hodi hasae literásia dijitál no dídia ba sira nia sidadaun. Ida ne’e hala’o tanba desde inisiu bainhira teknolojia online mósu, mundu infrenta funu bo’ot ida hodi kombate hoax sira iha mídia online. Programa literásia dijitál no mídia sai agenda ne’ebé importante tebes hodi hasees nasaun husi ameasa ba konflitu internál sira. Haree ba ameasa ne’ebé bo’ot, nasaun hanesan Estadus Unidus Amerika, Kanadá, Serbia, Nasoens Nórdicos sira, Austrália, Indonézia, Filipina no Myanmar implementa ona programa hasa’e abilidade literásia mídia no dijitál tantu liuhusi programa espesífiku ba grupu vulneravel sira to’o eskala bo’ot hanesan kria programa literásia dijitál iha sira nia kurríkulu eskola nian. Alende ne’e, ohin loron informasaun falsa mós sai ona problema seguransa no sai sujeitu ba investigasaun husi servisu intelejénsia sira nian atu prevene provokasaun ne’ebé bele kria konflitu ho eskala bo’ot iha nasaun nia laran.
Iha era dijitál ohin loron, abilidade literásia dijitál no mídia sai rekursu báziku ne’ebé importante tebes ba kada individuál hodi proteje án husi amesa oin-oin.

Tuir Renee Hobbs (2011), literasia dijitál no mídia maka hanesan abilidade hodi uza testu, ekipamentu no teknolojia; abilidade hodi hanoin no halo análiza kritíku, prátika forma mensajen no prodús kreatividade; abilidade hodi partisipa iha reflesaun no iha sentidu étiku; nomós partisipa ativu liuhusi serbisu hamutuk iha grupu. Hobbs mós akresenta, bainhira ema iha kompeténsia literásia dijitál no mídia, sira bele hatene saida mak sai nu’udar agenda partikulár husi kompañia boot sira, partidu polítiku, redasaun mídia no seluk tan iha sira ninia programa.

Nia mós hatutan, literásia dijítal no mídia bele hametin no haburas lia loos ne’ebé lakon iha komunidade nia leet tanba hoax sira. Bainhira sidadaun ida bele identifika no hadi’a problema ruma ligadu ho hoax ho liafuan odiu no seluk tan, nia uza nia direitu hodi hamoos ambiente foer tanba polusaun ne’e.

Iha Timor-Leste, Governu, jornalista no grupu joven hala’o ona kampaña ligadu ho literásia dijitál no mídia hodi kombate hoax. Asaun ida ne’e hala’o nu’udar preokupasaun husi impaktu negativu hoax ne’ebé lori ameasa boot ba estabilidade nasionál Timor-Leste nian hanesan nasaun post konflitu.

Parte seluk, esforsu prevensaun no kontrolu COVID-19 mós hasoru dezafiu bo’ot, liu-liu kona ba dúvida ba ezisténsia no impaktu reál husi COVID-19 ba saúde públika. Alende ne’e, esforsu ba mitigasaun COVID-19 ho kampaña vasinasaun governu nian ne’ebé dadaun ne’e la’o namanas hela mós hasoru dezafiu bo’ot tanba informasaun oin-oin ne’ebé espalla iha rede sosiál kona-ba efetividade no efeitu husi vasina ne’ebé agora dadaun iha.

Hodi ultrapasa dezafiu hirak ne’e, abilidade literasia dijitál no mídia mak sai nu’udar xavi ne’ebé bele fó poder no koñesimentu kle’an ba sosiedade konaba asaun hirak ne’ebé presiza prevene, kontrola, no kombate COVID-19 iha Timor-Leste. Ho abilidade ne’e sosiedade sei hanoin krítiku no kuidadu án bainhira konsumu informasaun sira no bele hatene identifika informasaun ne’ebé loos no la loos.

Referénsia:
Hobbs, R. (2011). Dijítal and mídia literacy: Connecting culture and classroom. Corwin Press.

Hakerek nain Estudante Mestradu FISIP Universidade Atma Jaya Yogyakarta.

HAKEREK NO HATÁN

Please enter your comment!
Please enter your name here